Begoña Balado, concelleira de Turismo, Comercio e Obras no casco urbano de Arzúa, detallou en Radio Líder Santiago diversos proxectos e eventos para o concello. A entrevista abordou asuntos de actualidade, incluíndo iniciativas a curto e medio prazo para mellorar a calidade de vida e promover o turismo en Arzúa.
Líder Redacción
16 de julio de 2024 a las 19:31
A edil socialista explicou que para o último fin de semana de setembro, Día Mundial do Turismo, está previsto un evento de tres días que incluirá actividades gastronómicas, actuacións musicais, rutas turísticas, tapeo polos restaurantes e un mercado de produtores locais. Estas actividades teñen como obxectivo impulsar a economía local e ofrecer unha experiencia completa aos visitantes.
Balado anunciou ademais que se están organizando excursións dúas tardes á semana a distintos enclaves do concello, como as fervenzas das Hortas ou O Enredos do Abelleiro, entre outros. Estas actividades xurdiron en resposta ás peticións dos hostaleiros e albergues locais, que demandaban máis actividades para os visitantes. Recentemente, a Oficina de Turismo de Arzúa rexistrou a visita de 440 persoas, incluindo numerosos visitantes de Costa Rica e Panamá, dous países que estan moi de moda no Camiño de Santiago.
Arzúa é un dos concellos con máis aloxamentos de turismo rural en Galicia, ofrecendo opcións para todos os niveis económicos. No entanto, a proliferación de Vivendas de Uso Turístico (VUT) está a xerar preocupación. Balado destacou a necesidade de regular estas vivendas para garantir que estean legalizadas e regulamentadas, evitando así que perxudiquen ao resto de establecementos. Esta regulación está en proceso de estudo e prevese que se implante de cara ao ano que ben.
Doutra banda, e grazas a un convenio bianual con Turismo de Galicia, recentemente se reabriu o chiringuito de Ribadiso, unha área recreativa que estivo pechada durante cinco anos. Ademais, Balado mencionou os esforzos para recuperar a actividade deportiva en Portodemouros, un espazo que pertence a Naturgy. A concelleira indicou que están en negociacións para que a empresa de enerxía ceda o espazo ao Concello para poder acometer as melloras necesarias, aínda que recoñeceu que este proceso non é sinxelo e require a colaboración da Deputación e da Xunta. A idea é revitalizar este lugar privilexiado no centro de Galicia con actividades náuticas e eventos deportivos internacionais, xa que non hai moitos anos celebrábase neste enclave o Campionato de Europa de Piragüismo.
A edil de Obras de Casco Urbano lembra que Arzúa celebra as súas feiras os días 8 e 22 de cada mes, e que cada vez está máis de moda comer o polbo na vila. Por iso, a zona dos pulpeiros verá melloras coa instalación de vidreiras con imaxes antigas do municipio, que servirán para protexer da choiva e embelecer o espazo. Balado tamén anunciou o inicio da segunda fase das obras na Rúa Fraga do Rei, que comezarán despois do verán, e a remodelación do parque próximo ao Multiusos cunha inversión de 180.000 euros. Outras melloras urbanísticas incluirán intervencións na Rúa da Calexa, Rúa Nova e espazos vinculados ao Camiño de Santiago.
Finalmente, Balado destacou o traballo que se está a realizar para que a Festa do Queixo, que celebrará o seu 50 aniversario en 2025, sexa declarada Festa de Interese Turístico Nacional, subliñando a importancia desta celebración para Arzúa e a súa tradición queixeira.
A entrevista completa, no seguinte enlace.
Recibe las noticias en tu correo.
