O PP de Santiago lamenta que o BNG busque crear outro chiringuito coa nova empresa de vivenda

• Por este motivo, Constenla esixiu saber como se vai financiar a nova empresa pública Emuvisa, “vai ir contra os orzamentos? Imos ter que pagar todos os composteláns o novo chiringuito?”
• E pediu ao BNG que se poña a traballar dunha vez e deixe a política da propaganda, “desenvolvan por favor os plans parciais do SUD1, 2 e 3, e empecen a buscar inversores para desenvolver o polígono residencial de A Pulleira, que está listo para empezar”

O concelleiro do Partido Popular de Santiago, José Antonio Constenla, cualificou hoxe de “tomadura de pelo” o anuncio das partidas orzamentarias para a creación dunha nova empresa de vivenda municipal.

O edil popular preguntouse se realmente é necesaria unha nova empresa pública para a rehabilitación de edificios, tendo en conta que xa existe a figura do Consorcio e incluso cabería a posibilidade de implementar unha oficina de rehabilitación. Así salientou que “o que semella é que están a buscar un novo chiringuito co que poder aumentar o seu sultanato”.

Nese senso, Constenla lamentou que se crease unha comisión para estudar a posta en marcha desta nova empresa de vivenda, pero nada se teña feito desde hai case un ano, e sen embargo aparezan nos medios de comunicación informacións que non se levan a esa comisión. Por este motivo, esixiu saber como se vai financiar a nova Emuvisa, “vai ir contra os orzamentos? Imos pagar todos os composteláns o novo chiringuito?. Destacou ademais que “nada sabemos da súa viabilidade económica, mais alá de que o Concello xa está comprometendo gasto para unha empresa que aínda non existe, sen ter ni sequera os informes de viabilidade financeira que se esixiron na comisión.

O popular afeou que a política de rehabilitación do BNG vaia a consistir en comprar unha casa de dúas plantas con 4 habitacións no Arco de Mazarelos para rehabilitar, “esa é a súa política con altura de miras?”.

Ademais destacou que “Santiago ten solo suficiente para empezar a desenvolver, sen estar pedindo a outras administracións que fagan o traballo por eles; empezando polo SUD4, na Pulleira, que xa está aprobado”. E pediu ao BNG que se poña a traballar dunha vez e deixe a política da propaganda, “elaboren por favor os plans parciais do SUD1, 2 e 3, e empecen a buscar inversores para desenvolver o polígono residencial de A Pulleira, que está listo para empezar”.