O Pino mira ao futuro con vivenda protexida, humanización de rúas e defensa do rural

• O alcalde do Pino, Manuel Taboada, repasa os logros da lexislatura e avanza proxectos clave para a veciñanza durante a súa entrevista en Radio Líder Santiago.

O alcalde de O Pino, Manuel Taboada, visitou os estudios de Radio Líder Santiago para facer balance da lexislatura e compartir os proxectos clave que están en marcha ou que verán a luz nos próximos meses. A entrevista, conducida por Álvaro Veiga, permitiu afondar nos avances municipais, o papel clave do Camiño de Santiago na economía local, os retos urbanísticos e a aposta pola recuperación de tradicións coa emblemática Festa do Galo.

“A verdade é que levamos feito máis do previsto. Superamos xa a metade do programa electoral e algúns proxectos importantes xa están executados ou moi avanzados”, afirmou o alcalde.

Depuración de augas e infraestruturas críticas

Un dos fitos máis destacados foi a posta en funcionamento dunha nova infraestrutura de depuración no núcleo de Pedrouzo, fundamental para facer fronte á poboación flotante vinculada ao Camiño de Santiago. “Estamos a falar de máis de mil persoas que pernoctan cada día en Pedrouzo. A antiga infraestrutura quedaba pequena, era para a poboación empadroada, non para os milleiros de peregrinos que nos visitan ao ano”, explicou Taboada.

“As augas pasaron de grisáceas a cristalinas. Non fai falla ser técnico para ver que o traballo foi ben feito”, celebrou.

Esta obra contou cun investimento de máis de 2 millóns de euros e servirá tamén para ampliar o servizo a outros núcleos. O alcalde agradeceu o apoio da Consellería, pero advertiu da importancia do bo uso das instalacións: “Pedimos á veciñanza que non tire cousas impropias polos sumidoiros. Iso danaría a planta de depuración”.

Vivenda protexida para a mocidade e reordenación do rural

Outro dos grandes proxectos é a construción de vivendas de protección oficial para mozos e mozas. O Concello xa dispón dunha parcela para levantar entre 15 e 20 vivendas. “Se a acollida é boa, como creo que será, lanzaremos unha segunda fase”, avanzou o rexedor.

Non obstante, a preocupación pola vivenda non se queda nos núcleos urbanos. O goberno local tamén traballa nun reaxuste do plan xeral para facilitar a construción de vivenda no rural. “Hai moitos mozos que herdaron parcelas nas aldeas e non poden construír por estar clasificadas como solo rústico ou de especial protección”, explicou.

“Queremos que a xente poida volver ás súas orixes, vivir onde naceron os seus pais ou avós. Fixemos unha enquisa e hai máis de 200 persoas interesadas. Algúns casos non teñen lóxica urbanística, pero moitos si, e imos loitar por eles.”

Transporte e defensa dos gandeiros fronte ao lobo

Tamén houbo tempo para falar de demandas históricas xa solucionadas, como a problemática co bus a Santiago. “Tivemos que poñernos duros, pero conseguimos un autobús con máis prazas e agora non queda ninguén nas paradas”, asegurou.

No caso da presenza do lobo e os danos ao gando, o alcalde mostrou firmeza: “O lobo hai que respectalo, pero tamén hai que controlalo. Non pode andar descontrolado polos montes.”

O Camiño de Santiago como motor económico e símbolo local

O rexedor recoñeceu o papel esencial do Camiño de Santiago no dinamismo de O Pino: “Non quero nin imaxinar O Pino sen o Camiño. Seríamos un concello moi distinto, con crecemento moito máis lento”. E engadiu: “Os mellores embaixadores dun pobo son os peregrinos. Se marchan cun bo sabor de boca, volverán ou recomendarano a outros. Temos que coidalos e tratar ben a quen pasa por aquí.”

Tamén fixo un chamamento aos empresarios locais: “As administracións poden facer moito, pero os negocios tamén teñen que implicarse. Non se pode abusar do peregrino pensando que é só de paso.”

Festa do Galo: tradición recuperada e proxección exterior

A entrevista rematou cun convite aberto para a 26ª edición da Festa do Galo, que se celebra o primeiro fin de semana de agosto. “É unha cita que mestura gastronomía, artesanía, cabalos e cultura popular. Rescatamos a galiña piñeira cando estaba a piques de desaparecer, e hoxe xa a teñen criadores de Asturias, Portugal ou o País Vasco”, destacou.

Como novidade, este ano celébrase a media maratón “21 do Galo”, unha proba deportiva de 21 km entre Arzúa e O Pino, con versión máis curta de 8 km dende Ferreiros. “Queremos que sexa unha festa para toda a familia, para vir a gozar do sábado e domingo con concertos, feira cabalar, mostra de artesanía, animación infantil e moito máis”, resumiu.