Why Not? gaña a terceira convocatoria de Onda Chicha
Líder Redacción
19 de enero de 2026 a las 10:26
- A banda será protagonista dunha entrevista este mércores en Radio Líder Santiago. Está aberta a inscrición da cuarta tempada ata o 26 de xaneiro
Why Not? é o grupo gañador da terceira edición de Onda Chicha, a iniciativa de Radio Líder Santiago e Chichalovers destinada a apoiar e dar visibilidade ao talento musical emerxente de Galicia.
A banda está formada por estudantes universitarios de Vigo que viven en Santiago: Nerea (voz), Mario (baixo), Teo (batería) e Alejandro (guitarra). Fan cancións en galego, castelán e inglés, combinando influencias diversas dentro da escena actual.
A entrevista coa banda emitirase este mércores en Radio Líder Santiago, a través do 97.7 FM e tamén na páxina de Facebook da emisora.
Un xurado plural e voto do público por primeira vez
Nesta terceira convocatoria, o fallo correspondeu ao xurado integrado polo equipo de Chichalovers, Radio Líder Santiago, a Sala Capitol e o xornalista musical Rodri Míguez. Ademais, por primeira vez incorporouse o voto do público, que sumou preto de 1.000 participacións.
Tres edicións, tres proxectos gañadores
Onda Chicha celebrou ata o momento tres edicións. Na primeira, o premio recaeu en Lisdexia, mentres que na segunda resultou gañadora a banda Amaramar. Why Not? toma agora a testemuña como proxecto emerxente seleccionado polo xurado.
Que é Onda Chicha
Onda Chicha é unha iniciativa conxunta de Chichalovers e Radio Líder Santiago que ofrece ás bandas finalistas unha entrevista en radio con difusión en FM e redes sociais; a gravación dun tema en Chichalovers; unha entrevista en Quincemil; e a posibilidade de actuar no CHICHAFEST, que terá lugar na Sala Capitol o 13 de xuño de 2026.
Aberto o prazo da 4ª tempada
A cuarta convocatoria está xa aberta. As persoas interesadas poden inscribirse ata o 26 de xaneiro a través do seguinte enlace:
