Volve o programa Trouleando cunha xornada de barranquismo para a mocidade amesá

• A Concellaría de Mocidade de Ames retoma as actividades do programa Trouleando, desta volta, cunha xornada de barranquismo no río Almofrei, en Cotobade, que se desenvolverá o vindeiro 4 de outubro
• Nesta proposta que mestura deporte, diversión e aventura, e que consiste en descender a pé polo leito alto dun río, superando diferentes obstáculos, escalando, saltando pozas, nadando, etc., tamén lle permitirá aos participantes poder observar a paraxe natural e desconectar da rutina

Ames, 15 de setembro de 2025.- A Concellaría de Mocidade de Ames retoma as actividades do programa Trouleando, desta volta, cunha xornada de barranquismo no río Almofrei, en Cotobade. Así, a mocidade amesá poderá gozar dunha actividade na que se combina deporte, diversión e aventura. Realizarase o sábado 4 de outubro e, como vén sendo habitual, ofrecerase servizo de autobús dende Bertamiráns e O Milladoiro. O prazo de inscrición estará aberto dende o vindeiro 17 de setembro ata o día 21. As persoas interesadas deben inscribirse enviando a ficha de inscrición debidamente cumprimentada ao enderezo electrónico xuventude@concellodeames.gal. Hai 50 prazas dispoñibles que se asignarán por orde de chegada.

Coa volta as clases e á rutina, tamén retoma a súa actividade o programa Trouleando. Deste xeito, a Concellaría de Mocidade organiza para o mes de outubro unha nova xornada de diversión para a mocidade amesá. Nesta ocasión, a proposta é unha xornada de barranquismo no río Almofrei, ao seu paso polo concello de Cotobade. O barranquismo ou descenso de canóns consiste en descender a pé polo leito alto dun río, superando diferentes obstáculos, escalando, saltando pozas, nadando, etc. Ademais de facer deporte dun xeito diferente, está actividade permítenos poder observar a paraxe natural e desconectar da rutina.

A actividade realizarase o sábado 4 de outubro. Como vén sendo habitual, haberá servizo de autobús dende o Pazo da Peregrina ás 9.00 horas e dende a Casa da Cultura do Milladoiro ás 9.15 horas. O regreso aproximado está previsto para as 16.00h no Milladoiro e 16.15h en Bertamiráns.

Os mozos e mozas que participen na actividade deben levar bañador, toalla, camiseta térmica, zapatillas de deporte ou montaña que suxeiten ben o pé e que se poidan mollar e roupa e calzado de reposto para despois da actividade. Os participantes tamén deberán levar a súa propia comida. Ademais, contarase con todo o material de seguridade necesario para desenvolver correctamente a xornada de barranquismo.

Pode inscribirse a mocidade empadroada no concello de Ames, nada entre o 2012 e 1995 e que saiba nadar. O prazo de inscrición estará aberto entre o 17 de setembro e o día 21. Para participar, é preciso enviar a ficha de inscrición cuberta e asinada a xuventude@concellodeames.gal.

Hai 50 prazas dispoñibles que se irán cubrindo por orde de chegada, mais será preciso contar cun mínimo de 25 mozos/as para desenvolver a actividade, en caso contrario, o Concello de Ames, poderá anular a actividade. Para resolver posibles dúbidas pódese contactar coa Concellería de Mocidade a través do correo electrónico xuventude@concellodeames.gal ou chamar ao 616 08 32 29.