Un veciño de Melide ferido grave ao sufrir un accidente mentres desbrozaba

Un home resultou ferido esta tarde no concello de Melide mentres realizaba labores de desbroce nunha finca de súa propiedade, situada na parroquia de Furelos, preto da canteira. O 112 Galicia recibiu o aviso de Urxencias Sanitarias ás 16:45 horas deste luns.

Segundo informou o servizo de emerxencias, o home sufriu unha lesión de consideración nunha perna despois de que lle saltase un obxecto durante o traballo.

Ata o lugar desprazouse persoal sanitario a bordo do helicóptero medicalizado do 061 con base en Santiago. Ademais, desde o 112 mobilizáronse os Bombeiros do Parque Provincial de Arzúa, a Garda Civil e Protección Civil de Melide.

Nun primeiro momento, pensouse que o ferido se atopaba nunha zona de difícil acceso, polo que se solicitou o apoio dos bombeiros para facilitar o traslado. Finalmente, a colaboración dos equipos de emerxencias permitiu chegar ata o helicóptero sen necesidade dun rescate complexo.

O home foi evacuado en helicóptero ao Complexo Hospitalario Universitario de Santiago de Compostela para recibir atención médica.