Soziedad Alkoholika, El Drogas, Obús e Heredeiros da Crus encabezarán o cartel do novo ExpoROCK Festival na Coruña

O festival, organizado por ExpoCoruña en colaboración coa empresa Metronoventa, xa puxo as entradas á venda na súa web oficial desde 33 euros.

Ademais dos concertos, o evento ofrecerá un mercado vintage, unha concentración de motos Harley-Davidson e unha ampla zona de food trucks, convertendo o recinto nun auténtico punto de encontro para os amantes do rock.

Un dos aspectos máis novidosos será a programación matinal, pensada para que o festival se viva tamén en familia. Os menores de 16 anos poderán acceder de forma gratuíta acompañados por unha persoa adulta, coa idea de crear un espazo interxeracional, aberto e accesible.

O director de ExpoCoruña, Andrés Fernández, subliñou que o ExpoROCK Festival “non é só un gran cartel, senón o inicio dun proxecto con vocación de continuidade, que nace para quedar”. Engadiu que o recinto leva anos “impulsando novos formatos e ampliando o calendario cultural da cidade máis alá da tempada estival”.

Pola súa banda, Patricia López, de Metronoventa, destacou que se trata “dun festival fóra da tempada habitual”, co obxectivo de desestacionalizar o calendario festivalero e ofrecer unha experiencia potente tamén nos meses previos á primavera. “Non buscamos só sumar un festival máis, senón crear unha experiencia distinta, con actividades para toda a familia e unha ambientación única que converta A Coruña en punto de encontro para os amantes do rock”, afirmou.