Sindo Guinarte: «Sanmartín actúa como unha militante do BNG e non como unha alcaldesa»

• O voceiro socialista, Gumersindo Guinarte, lembra que a rexedora representa á totalidade da cidadanía compostelá e non só ao seu partido, e esixe que actúe con responsabilidade institucional.
• O PSdeG-PSOE cualifica a súa postura como “inadmisible” e reclama que exerza o cargo con respecto á institucionalidade e altura de miras.

O voceiro do Grupo Municipal Socialista do PSdeG-PSOE no Concello de Santiago, Gumersindo Guinarte, amosou a súa preocupación ante a información publicada nos medios de comunicación pola que a alcaldesa da cidade, Goretti Sanmartín, non asistirá ao acto de entrega da Medalla de Ouro de Galicia á Princesa de Asturias, previsto para hoxe luns.

Guinarte advirte de que “a que parece vai a ser a ausencia, unha vez máis, da alcaldesa de Santiago, Goretti Sanmartín nun acto institucional este luns” sinala que “non é un comportamento propio da alcaldesa da nosa cidade que representa a toda Corporación Municipal e que representa o conxunto da cidadanía de Santiago de Compostela”, que lembrou que a rexedora “representa o conxunto da cidadanía de Santiago de Compostela”.

Desde o Grupo Municipal Socialista consideran que a decisión de Sanmartín “máis ben parece un acto propio dun militante ou dunha militante do BNG e de quen van facer un escrache á porta de Raxoi”.

Neste sentido, o PSdeG-PSOE insiste en que “a alcaldesa de Santiago é alcaldesa de todas e todos e ten que comportarse como alcaldesa estea ou non de acordo cos actos institucionais que se levan a cabo” xa que segundo Guinarte “eso é o que significa a institucionalidade, a representación máis alá da propia ideoloxía política nun momento dado”.

A formación socialista considera inaceptable que Sanmartín eluda a súa responsabilidade institucional, lembrando que “non representa ao seu partido político e é nese sentido un comportamento inaceptable”, polo que segundo as e os socialistas debe actuar con respecto e altura de miras en actos que non son de partido, senón da institución e esixen á alcaldesa que reconsidere a súa postura e cumpra co que se espera dunha representante pública no máis alto cargo da cidade.