Silleda convoca tres prazas de socorrista

• As persoas interesadas poderán presentar as súas solicitudes dende o venres 7 ata o martes 11 de xuño

Silleda. 6-6-2024.- O Concello de Silleda saca a concurso tres prazas de socorrista para cubrir a campaña de verán nas piscinas municipais de Silleda e Bandeira. As solicitudes poderán facerse dende mañá, venres 7 de xuño, ata o martes 11 de xuño presentando a documentación no Rexistro Xeral ou a través da sede electrónica.

Silleda abre deste xeito unha bolsa de emprego de socorristas, que se rexerá polo sistema de concurso de persoal funcionario interino, para poder levar a cabo a campaña ‘Salvamento e socorrismo nas piscinas municipais de Silleda no verán 2024”.

As persoas interesadas en participar no proceso deberán ter polo menos 16 anos e estar en posesión do título de socorrista acuático ou equivalente, acreditado mediante documentación oficial e a inscrición no Rexistro Profesional de Socorristas Acuáticos de Galicia.

Nas solicitudes deberá constar o formulario debidamente cuberto, copia do DNI, do título de socorrista e acreditación do Rexistro Profesional de Socorristas, da documentación acreditativa dos méritos e do carné de conducir B1, así como o certificado negativo do Rexistro Central de Delincuentes Sexuais, a declaración responsable correspondente ao Anexo II e a acreditación do pagamento das taxas.

As taxas ascenden a 15 euros e deberán aboarse na conta do Concello de Silleda ES27 2080 5443 3731 1010 0171

Entre os méritos que se valorarán atópase a experiencia profesional na Administración, a experiencia no sector privado e a formación e cursos realizados.

As bases da convocatoria poden consultarse na páxina web do Concello de Silleda (www.silleda.es).