Santiago prepárase para a Semana Santa: descubre a programación completa

• A Semana Santa de Santiago de Compostela foi declarada Festa de Interese Turístico de Galicia no 2018

A concelleira de Turismo, Míriam Louzao, a xerente de Turismo de Santiago, Flavia Ramil, o arcebispo da Diócese de Santiago, Francisco José Prieto, e a presidenta da Xunta da Confrarías, María Elena Bernárdez, presentaron no Pazo de Raxoi o folleto que recolle o programa de actividades que neste ano se desenvolverán no mes de abril arredor da Semana Santa. O programa está xa dispoñible na oficina de información de Turismo de Santiago, na rúa do Vilar, así como nas sedes das distintas confrarías de Santiago.

A Semana Santa é un evento que marca o comezo da tempada alta turística en Compostela, e que conta cun gran atractivo turístico, tal e como recoñece a declaración de Festa de Interese Turístico de Galicia, que recibiu no ano 2018. Por iso, un dos obxectivos é promocionar, ademais dos propios días centrais da celebración, as actividades que se desenvolven previamente para continuar fomentando a desestacionalización dos fluxos turísticos na cidade.

Por estes motivos, dende o Concello de Santiago, en colaboración coa Xunta de Confrarías, edítase cada ano un folleto que recolle non só as as celebracións relixiosas e litúrxicas propias destas datas, senón tamén outro tipo de actividades dirixidas a distintos perfís de turistas: culturais, gastronómicas e de natureza.

O folleto recolle as múltiples procesións que percorrerán o casco histórico compostelán do 11 ao 20 de abril, ademais da traslación do Cristo da Paciencia o 27 de abril. O folleto inclúe ademais unhas palabras do presidente da Xunta da Semana Santa de Medina del Campo, David Muriel, quen dará o pregón das festas o 5 de abril. Cabe destacar que a Semana Santa de Medina del campo é Festa de Interese turístico Internacional.

O programa inclúe as actividades culturais e exposicións que terán lugar durante estas semanas. Tamén destaca os concertos que se celebrarán dentro de «De Lugares e Órganos», ciclo musical centrado no patrimonio organístico de Santiago. Ademais, inclúe os horarios de apertura de igrexas, algunha das cales abre excepcionalmente en Semana Santa.

Respecto da gastronomía, inclúense a celebración da Festa das Uñas de San Lázaro, que terá lugar do 4 ao 7 de abril, e na que se pode degustar o tradicional prato de uñas en máis de vinte locais, tanto do barrio de San Lázaro como doutros barrios de Compostela.

Finalmente, inclúese unha proposta para amantes da natureza baixo o nome de «Santiago Natural», recomendando un conxunto de dez sendas naturais accesibles camiñando dende a cidade, de curta e media duración, pensadas para realizar nun par de horas e orientadas especialmente para familias, que permiten ver a excepcional relación que da entre o centro urbano de Compostela coa súa contorna natural.

Pode consultarse máis información en www.semanasantasantiago.es.