Santiago mellorará a distribución de mercadorías coa posta en marcha da plataforma loxística

Esta nova plataforma de distribución de mercadorías é un proxecto pioneiro da loxística de última milla, con especial incidencia na distribución de produtos alimentarios, aspirando a servir de modelo para outras mercadorías, para outros centros históricos e para o resto de zonas urbanas.

Resolver una situación que vén de atrás

A situación da distribución de mercadorías na cidade histórica de Santiago de Compostela é, na actualidade, unha das principais preocupacións das administracións, da veciñanza e das empresas da cidade.

Isto débese especialmente ao seu impacto na calidade do aire, á ocupación das vías públicas, ao perigo que supón nunha zona peonil ateigada de peóns en determinadas épocas do ano, ao horario de distribución limitado e aos danos ao patrimonio arquitectónico dunha cidade Patrimonio da Humanidade.

Para o Concello de Santiago, a mellor forma de resolver esta situación a medio e longo prazo é a creación dunha plataforma loxística de distribución  nas aforas da cidade, ben conectada por vías de alta capacidade e próxima á zona de entrega final, onde as empresas de transporte poidan depositar os seus envíos na cidade histórica, que se consolidarán no centro e se entregarán en vehículos de cero emisións.

Con esta nova plataforma de distribución de mercadorías que operará na cidade histórica, o Concello quere reducir o número de vehículos de transporte que acceden á zona, reducir as emisións contaminantes, reducir o impacto do tráfico sobre o patrimonio monumental e, como consecuencia final, liberar o espazo peonil para a cidadanía.

O proxecto da Plataforma loxística de distribución de mercadorías na cidade histórica de Santiago de Compostela forma parte da implantación da Zona de Baixas Emisións (ZBE) e está financiado polo Plan de Recuperación, Transformación e Resiliencia, a través do Ministerio de Transportes, Mobilidade e Axenda Urbana (MITMA) mediante o Fondo Europeo de Recuperación Next Generation EU.

Proceso aberto e participativo

Dende o momento do nacemento desta iniciativa, o Concello de Santiago  sempre tivo presente que era necesario coñecer a opinión e as necesidades dos sectores implicados, polo que iniciou un proceso participativo para definir o funcionamento e xestión da plataforma loxística.

Para iso, nos primeiros meses do 2025 realizáronse preto de 400 enquisas a bares, restaurantes, comercios e supermercados e realizáronse unha serie de talleres informativos con empresas de distribución.

Posteriormente, o Concello mantivo mesas de traballo presenciais con membros dos sectores implicados e interesados no desenvolvemento da futura plataforma e do seu uso, como con asociacións de Horeca (sector que reúne aos hoteis, restaurantes e cafeterías da cidade), do ocio nocturno, do comercio, do reparto e da propia veciñanza, dentro das accións de participación e de sensibilización social que está levando a cabo para a presentación da posta en marcha da plataforma loxística.

Neses encontros, o Concello de Santiago presentou a todas as persoas asistentes todo o traballo desenvolvido ata o momento sobre o proxecto, as vantaxes da súa implantación para o desenvolvemento sostible da cidade e o establecemento de prioridades para a posta en marcha da plataforma loxística.

Dende o primeiro momento a representación das asociacións implicadas amosou a súa predisposición a colaborar coa Administración local para axudarlles a crear o mellor modelo de organización da futura plataforma loxística.

A liña de diálogo entre o Concello e os sectores implicados mantense aberta e nese proceso de participación as asociacións de hostalaría, comercio e alimentación da cidade histórica, distribuidores e repartidores seguen a trasladar as súas opinións e inquedanzas co obxectivo de contar con todos no deseño dun modelo de cidade sustentable, accesible e habitable.