Santiago celebrará o Día das Letras Galegas cun concerto de cinco corais locais

A concelleira de Festas, Pilar Lueiro,  sinalou que se unen  ao recoñecemento ás cantareiras e pandeireteiras «que representan as mulleres que ao longo dos séculos mantiveron a tradición ata facela chegar á actualidade e que mellor que facelo coa música de cinco corais de Compostela: a coral Ponte Mantible, o coro Asubío, a coral Amigos do Castiñeiriño, o Coro Crecente de Voces Graves e a coral Solfa”.

A coral Ponte Mantible nace en setembro de 2002 coa intención de fomentar a música popular no barrio da Guadalupe e a súa contorna. O repertorio desta coral componse preferentemente de cancións populares galegas, habaneras, algunha peza dos músicos de palacio dos séculos XV, XVI e tamén música relixiosa. Na actualidade componse de 28 membros de idades comprendidas entre os 50 e 75 anos.

O coro Asubío fundouse en 2011 baixo a batuta de Rubén Pego para reunir voces que levaban tempo cantando xuntas noutras agrupacións musicais e, paseniño, foi engadindo novos membros até acadar os 22 compoñentes na actualidade. O repertorio que interpreta a coral é moi diverso, desde polifonía renacentista e clásica até pezas actuais e populares galegas. As súas actividades desenvólvense no territorio galego, en distintos certames de corais e actuacións na vía pública. Tamén colabora con asociacións sen ánimo de lucro mediante actuacións solidarias en hospitais, centros de maioers e festivais benéficos. Desde o ano 2015 colabora no marco de actividades ofrecidas polo Ateneo de Santiago de Compostela.

A Coral Amigos do Castiñeiriño fundouse dentro da Asociación Amigos do Castiñeiriño no ano 2005. Actualmente conta con 25 voces mixtas. Nestes vinte anos, a coral Amigos do Castiñeiriño participou en moitos eventos, sendo os máis recentes o Certame de corais do Castiñeiriño, Banquete de Conxo, Cantos Corais da Ascensión, Panxoliñas de Nadal no Teatro Principal e Concerto de Corais de primavera no centro sociocultural de Aríns.

Coro Crecente de Voces Graves. A Asociación Musical e Cultural Crecente comezou a súa andaina no barrio de Conxo en abril de 2019 por iniciativa de varios coristas partícipes na montaxe da ópera La Traviata. O coro está formado actualmente por 26 voces graves, organizadas en catro cordas. Desde o seu inicio Crecente mantén unha intensa actividade participando en numerosos certames e ofrece concertos centrados na posta en valor do repertorio musical galego. O seu repertorio abarca unha ampla variedade de xéneros, incluíndo a emotividade da música sacra, a alegría das panxoliñas galegas e o encanto nostálxico das habaneras, ademais da rica tradición da música popular galega.

Coral Solfa. A Asociación Cultural-Musical Solfa fundouse no barrio das Fontiñas en 1997. Centrou o seu traballo na formación musical da mocidade e no goce coa música, sempre co propósito de contribuír a reforzar e revalorizar a nosa cultura e a normalizar o noso idioma. O froito do traballo destes anos deu vida á Coral Solfa. Con máis de 100 pezas, o repertorio da coral bebe da música tradicional galega e portuguesa e de textos de escritoras/es galegos e da lusofonía: Rosalía, Pondal, Curros Enríquez, Francisco Añón, Cabanillas, Manuel María, Fiz Vergara, Fernando Lopes Graça… No ano 2023 gravou un CD contribuíndo, así, a difundir e enriquecer a música galega.