Preto de 350 ciclistas participarán este domingo na Transgalaica Ames 2026

• A Transgalaica Ames 2026 será a primeira das cinco probas que percorrerán a xeografía galega este ano, convertendo a Bertamiráns no epicentro do ciclismo nacional
• A proba está organizada polo club ciclista amesán Os Esfola Arrós e a empresa Team Relay, e, ademais, conta coa colaboración da Concellaría de Deportes do Concello de Ames

Ames, 26 de febreiro de 2026.- O Concello de Ames, en colaboración co club ciclista amesán Os Esfola Arrós e a empresa Team Relay (Transgalaica) acolle este domingo 1 de marzo unha nova edición da carreira ciclista Transgalaica, un dos circuítos de BTT máis importante do noroeste español e unha das citas con maior repercusión no mundo do ciclismo. Nesta décima entrega que se organiza en Ames hai inscritos 345 ciclistas (334 na Transgalaica e 11 na Transgalaica do futuro correspondente á categoría júnior). A saída realizarase dende o Pazo da Peregrina de Bertamiráns ás 9:30 horas, onde comezará un circuíto de 32 quilómetros que haberá que percorrer dúas veces, facendo así en total unha proba de 64 quilómetros.

O vindeiro domingo 1 de marzo, o Concello de Ames ten a honra de inaugurar o circuíto de BTT máis importante do noroeste español. A Transgalaica Ames 2026 será a primeira das cinco probas que percorrerán a xeografía galega este ano, convertendo a Bertamiráns no epicentro do ciclismo nacional. Con 10 anos de historia consecutiva (salvo a paréntese de 2021 por mor da situación epidemiolóxica provocada pola Covid), esta cita é xa un emblema pola súa beleza paisaxística. O Pazo da Peregrina e o icónico Monte San Marcos volverán a ser algúns dos lugares por onde discorrera esta proba de ciclismo de montaña.

Esta proba, que se vai celebrar o domingo 1 de marzo e a cal conta con 345 participantes inscritos, está organizada polo club ciclista amesán Os Esfola Arrós e a empresa Team Relay, e, ademais, conta coa colaboración da Concellaría de Deportes do Concello de Ames. Este ano o circuíto de bicicleta de montaña Transgalaica conta con cinco probas: a primeira será a de Ames, e seguiranlle o 15 de marzo a proba de Silleda, o 29 de marzo a de Cerdedo-Cotobade, o 26 de abril a proba de Friol e o 10 de maio pecharase o calendario na Estación de Manzaneda.

Percorrido da proba

Ás 9.30 horas, os ciclistas comezarán a pedalear diante do Pazo da Peregrina de Bertamiráns. A proba pasará polas inmediacións de Aldea Nova, Covas, Augapesada e Lamas ata chegar ás instalacións do Real Aeroclub de Santiago, en Piñeiro. Unha vez aí, os corredores pasarán polo alto do monte Liñaredo, os arredores do Monte San Marcos e Ventosa. Dende aí volverase ata Bertamiráns pola emblemática baixada da alta tensión do monte preto de Aldea Nova. O percorrido completo pode ser consultado en Wikiloc.

Estímase que os primeiros ciclistas completen a primeira volta sobre as 10:49 e a segunda sobre as 12:03 horas. Antes, dende as 8:00 horas, comezará a entrega de dorsais na propia zona do Pazo. Pola súa banda, a entrega de premios terá lugar a partir das 14:00 horas. O percorrido desta edición será semellante ao da pasada edición. Na segunda volta, non se subirá á zona de Aldea Nova e os participantes irán directamente polo sendeiro fluvial Rego dos Pasos, que estará debidamente indicado o propio día da proba.

Os/as participantes terán que dar dúas voltas a un circuíto de 32 quilómetros completando un percorrido de 64 quilómetros (aproximadamente) e que conta cun desnivel de 1.600 metros. Por motivos loxísticos e de seguridade, establécese un control de paso no quilómetro 32 da proba. Os/as participantes que non pasen por el antes de 2 horas e 10 minutos deberán retirarse clasificando co tempo marcado nese punto. Ademais, haberá unha carreira sprint, na que o seu resultado computará puntos para a clasificación xeral absoluta da Transgalaica. Só puntuarán os primeiros 25 clasificados en pasar pola liña de meta na primeira volta. Premendo nesta ligazón podes consultar o regulamento xeral da Transgalaica.

Restricións de tráfico previstas esta fin de semana

O desenvolvemento da proba obrigará a establecer unha serie de restricións no tráfico rodado local. Deste xeito, prohibirase o estacionamento na avenida José Luis Azcárraga dende o sábado 28 de febreiro, ás 23.00 horas, ata o domingo 1 de marzo, ás 15.00 horas. Tamén haberá cortes de tráfico nesta avenida José Luis Azcárraga ata a aldea de Capeáns o domingo1 de marzo dende as 7.30 ata as 15.00 horas.

Por este motivo, e para garantir a seguridade e integridade dos participantes e demais veciñanza, recoméndase evitar as vías mencionadas e utilizar un desvío alternativo dende Covas cara a Bertamiráns: DP-0203 (Augapesada – Bertamiráns), AC-453 (Roxos – Portomouro) e AC-543 (Santiago – Bertamiráns). Podes consultar a información completa na seguinte ligazón.

Orde de saída e clasificacións

A orde de saída estará determinada nos seus 100 primeiros postos polas 100 primeiras posicións da clasificación xeral absoluta da Transgalaica. A organización resérvase ademais 10 dorsais de libre designación. O resto de ciclistas colocarase por orde de inscrición. Estableceranse as clasificacións individuais masculina, feminina e clasificación por equipos. Para a clasificación xeral individual puntuarán as 75 primeiras persoas da clasificacións absoluta de cada proba. A maiores, establecerase unha clasificación por categorías para a que puntuarán os 25 primeiros de cada categoría.

Ademais destas puntuacións, haberá trofeos para os tres primeiros de cada sub-categoría, tanto masculina (S23, elite, M30, M40, M50/60), como feminina (elite-sub23 e máster).