Pepo Suevos celebra 25 anos de carreira cun espectáculo de ‘improvisación’ no Monte do Gozo

O humorista galego anuncia en Radio Líder Santiago unha actuación especial en Santiago o 11 de decembro: “Quero que esta cita marque e que Santiago volva ser referencia do humor galego”

O humorista, actor e guionista Pepo Suevos está a celebrar un cuarto de século de carreira cunha xira que percorre Galicia baixo o título “25 anos de humor”, composta por 25 actuacións en homenaxe aos seus 25 anos nos escenarios. Entre todas as paradas, hai unha que destaca especialmente: a que terá lugar o 11 de decembro ás 21:00 horas no Monte do Gozo de Santiago de Compostela, unha cita que o propio artista definiu como “a máis simbólica e especial” de toda a xira. “Quero que esta actuación marque e que Santiago volva ser referencia do humor galego. En Santiago chegou a haber actuacións en directo todos os días da semana, e iso perdeu forza. Hai que recuperalo”, afirmou Suevos durante a súa conversa con Álvaro Veiga, onde presentou o evento acompañado de anécdotas, humor e moita retranca.

O espectáculo, organizado en colaboración con Radio Líder Santiago e coa cafetería do Monte do Gozo, ofrecerá unha noite de humor participativo, improvisación e moitas risas. As entradas teñen un prezo simbólico de 5 euros, algo que o propio cómico xustifica así: “O importante é que a xente encha a sala e pase unha noite inesquecible. Cinco euros é o prezo dunha copa, e prefiro que a xente os gaste en rir.”

Dende o karaoke ata o cine: 25 anos de humor galego

Durante a entrevista, Pepo Suevos fixo un repaso pola súa traxectoria, lembrando os seus comezos en Santiago, cando traballaba en hostalaría e animaba o público imitando a Javier Gurruchaga nun karaoke: “Empecei no Coyote Karaoke, facendo imitacións de Gurruchaga. O dono pedíame que subise cantar para animar á xente, e así fun perdendo a vergonza.”

Aquela espontaneidade marcou o seu estilo: humor directo, improvisado e moi ligado ao público. Dende entón, percorreu un longo camiño: porteiro en locais de ocio, colaborador de radio e televisión, actor en series e películas, e figura habitual dos escenarios galegos. “O humor foi a primeira chispa, pero tamén son actor, guionista, presentador e, agora, mesmo influencer en TikTok”, dixo entre risas.

Suevos recoñeceu que a súa forma de facer humor baséase na improvisación e na conexión co público: “Non podo ir a un escenario só a repetir un texto. A cabeza vai máis rápido ca media, e iso permíteme estar fresco e crear momentos únicos en cada actuación.”

E engadiu, con orgullo de pioneiro: “O que agora se chama ‘impro’ ou ‘meterse co público’ eu xa o facía hai dezaoito anos. Sempre me gustou que cada espectáculo fose diferente.”

Do escenario á pantalla

Alén do humor en directo, Pepo Suevos tamén vive un momento moi activo no audiovisual galego. “Este ano foi prolífico: gravei tres películas e dúas series. Entre elas, a segunda tempada de Clanes e unha adaptación das novelas de Leo Caldas, O último barco, con Javier Gutiérrez”, contou durante a charla.

Tamén confirmou que algunhas das novas películas chegarán ás salas en 2026, incluíndo coproducións con Alemaña e títulos integramente en galego. “Hai crime, morriña, emigración… pero nada de drogas, polo menos nas miñas escenas!”, bromeou.

O regreso a Compostela

Para o artista, a cita compostelá do 11 de decembro ten un valor simbólico e emocional. Non só porque Santiago foi o lugar onde comezou a súa carreira, senón tamén porque busca devolver á cidade o protagonismo que tivo no humor galego: “En Compostela vivín unha época dourada do monólogo. Había xoves nos que en calquera bar había un cómico actuando. Iso hai que recuperalo, e por iso quixen facer aquí unha das grandes da xira.”

A actuación será no Monte do Gozo, un espazo que Suevos eloxiou polo seu confort e accesibilidade: “Escollemos o Monte do Gozo porque é un sitio acolledor, cun bo servizo e, sobre todo, onde non hai problemas para aparcar. Non quero que ninguén poña esa excusa para non vir.”

Tamén avanzou que haberá regalos e sorteos durante a gala: “Levarei merchandising, haberá sorpresas e agasallos. Quero que sexa unha festa, unha celebración de 25 anos de risas.”