Ovidio Rodeiro destaca o traballo veciñal e a singularidade da Festa das Carrozas do San Cidre

A parroquia do Oural, en Boqueixón, prepárase para vivir esta fin de semana unha edición histórica da Festa das Carrozas do San Cidre. A celebración alcanzará a súa 52 edición convertida xa nun referente da tradición popular galega e estreando ademais este ano o distintivo de Festa de Interese Turístico de Galicia.

Nunha entrevista en Radio Líder Santiago, o alcalde de Boqueixón, Ovidio Rodeiro, destacou que este recoñecemento “acredita o traballo dos homes e mulleres da parroquia do Oural” e puxo en valor “esa unión que teñen os veciños e veciñas para sacar adiante unha iniciativa que levan mantendo viva desde hai máis de medio século”.

O rexedor definiu o San Cidre como “unha celebración moi diferente”, na que “cada unha das aldeas constrúe unha carroza na que representa os oficios do campo”. “Antes xuntábanse cos carros e cos bois e hoxe son auténticas plataformas rodantes”, explicou, destacando a evolución dunha festa que continúa mantendo intacta a súa esencia tradicional.

Meses de traballo e segredo ata o desfile

Ao longo da entrevista, Rodeiro puxo especialmente o foco no enorme esforzo veciñal que hai detrás de cada edición. “Construír unha carroza leva moitas semanas de traballo, moitas tardes despois da xornada laboral clavando puntas, serrando madeira e perfilando toda a parte ornamental”, relatou.

Un dos elementos máis curiosos da celebración segue sendo o segredo absoluto co que se elaboran as carrozas. “Ningún membro dunha carroza pode ir ver o que está facendo a outra”, comentou, explicando que nin sequera os propios participantes coñecen os detalles das creacións do resto das aldeas ata o momento do desfile.

Actualmente participan sete carrozas, ás que se suma tamén unha proposta infantil impulsada arredor da escola unitaria para involucrar ás novas xeracións e garantir a continuidade da tradición.

Gastronomía, música e ambiente popular

A programación arrancará o sábado ás 22:00 horas coa tradicional misa na honra á Nosa Señora de Fátima e unha procesión nocturna acompañada pola agrupación “Sete Pontes”. A partir das 23:00 horas celebrarase a verbena co Grupo Tatoo e a Discoteca Móbil Pirámide XXL co DJ Marcos Kintana.

O día grande chegará o domingo, coincidindo ademais este ano co Día das Letras Galegas. As carrozas estarán expostas en Camporrapado desde as 11:00 horas e desfilarán ao mediodía polas rúas do Oural acompañadas polas charangas BB+ e Os Atrevidos e pola banda de gaitas Nova Fronteira.

Segundo explicou o alcalde, “a partir das 11 poden empezar a achegarse” os visitantes para ver as distintas creacións antes do desfile cara ao campo da festa.

Ás 14:00 horas terá lugar a inauguración oficial coa entrega de premios e o pregón da actriz e presentadora María Mera, moi vinculada tamén ao municipio. Posteriormente celebrarase a tradicional degustación de viños e petiscos nas distintas carrozas.

Sobre o ambiente que se vive durante a celebración, subliñou tamén o carácter acolledor e gastronómico da cita. “Cada carroza está especializada nun produto e ofrece pinchos, petiscos e viño aos visitantes”, explicou, asegurando ademais que “non coñezo ningunha festa onde se invite a viño e pinchos como no San Cidre”.

O rexedor lembrou ademais que os asistentes poden colaborar coa tradicional “vontade” que se deposita nas distintas carrozas para axudar a sufragar os gastos da festa.

Pola tarde haberá xogos para os máis pequenos, actuacións musicais e o fin de festa coa orquestra La Ocaband. Ademais, durante toda a xornada haberá exposición de tractores antigos, polbeiro, food trucks, atraccións infantís e zonas habilitadas para xantar en familia.

Un libro para conservar a memoria do San Cidre

Outro dos protagonistas desta edición é o libro “Carrozas do San Cidre. Costumes, agro e tradición”, presentado recentemente e nacido a partir do documental realizado sobre a festa. Na entrevista, Rodeiro definiuno como “un traballo rigoroso” que “recolle o espírito da festa, esa unión dos veciños e a paixón que eles poñen para sacar adiante cada ano as festas”.

O alcalde puxo tamén en valor a recuperación de fotografías e lembranzas históricas da parroquia a través desta publicación. “Recoller esas fotos e esa memoria viva dun pobo nunha publicación que queda para o futuro” é, segundo indicou, un dos grandes valores deste proxecto.

Carreira das Letras e promoción do territorio

Coincidindo co Día das Letras Galegas, Boqueixón acollerá tamén a XII edición da Carreira Camiño das Letras, que unirá o Pico Sacro coa Cidade da Cultura, nun percorrido de 15 quilómetros.

Sobre esta cita, explicou que se trata dun evento deportivo que tamén “promociona a nosa lingua, a nosa historia e o Camiño de Santiago”, poñendo en valor o simbolismo dun percorrido que conecta dous espazos “moi especiais para Galicia”.

Infraestruturas e servizos

Durante a conversa, o alcalde repasou tamén distintos proxectos impulsados actualmente no municipio relacionados co saneamento, as sendas peonís ou a mellora de estradas municipais. Tamén se referiu á concentración parcelaria de Lamas, Loureda, Sergude e Vigo e aos programas de conciliación e apoio ás familias impulsados polo Concello.

O alcalde destacou ademais que Boqueixón conta xa con tres celebracións distinguidas como festas de interese turístico: a Festa da Filloa de Lestedo, de Interese Turístico Nacional; o Entroido de Sergude (Xenerais da Ulla), de Interese Turístico de Galicia; e agora tamén as Carrozas do San Cidre. “As parroquias teñen moitísima forza, unión e ganas de traballar”, asegurou Rodeiro, destacando a implicación veciñal á hora de manter vivas as tradicións do municipio.