O PSOE endurece a súa oposición en Santiago: “será esixente e insistente”
Santiago de Compostela, 5 de outubro de 2024. A licitación de obra pública en Santiago descendeu, entre xaneiro e agosto deste ano un 64,92%, pasando dos 7,05 millóns de euros do 2023 aos tan só 2,5 millóns de este. Son os datos que proporciona a Federación Galega de Construción e que, segundo o Grupo Municipal Socialista, veñen a confirmar unha “relentización no funcionamento do Concello”.
Líder Redacción
5 de octubre de 2024 a las 14:52
Archivo
Así o asegurou este sábado o portavoz socialista, Gonzalo Muíños, quen cualifica os datos de “alarmantes”, sobre todo, “porque hai proxectos que teñen financiación europea que non avanzan na súa licitación e que, de facelo, suporían un incremento considerable nesa cifra”.
Muíños cita entre estes proxectos, o ecobosque do Banquete de Conxo, que prevé replantar a zona con especies autóctonas; a posta a punto dos polideportivos de Vite ou Santa Isabel ou o proxecto ‘Entre Sar e Sarela’, que contempla actuacións na lagoa do Auditorio, en Pontepedriña, no Viso ou a creación do Xardín Botánico no Campus Sur.
Oposición “esixente e insistente”
“Proxectos hai e financiación tamén” conclúe o portavoz socialista que advirte que, detrás do descenso na licitación de obra pública está un fallo na “tramitación e impulso” dos mesmos. Precisamente adianta Muíños que ese será un dos focos nos que se centrará a acción opositora do Grupo Municipal Socialista nos vindeiros meses, facendo unha oposición “esixente e insistente” para que “o goberno impulse de forma decisiva estas actuacións”.