O PP solicita un Pleno en Conxo con motivo do centenario da súa adhesión ao Concello de Santiago

A concelleira do Partido Popular de Santiago, María Baleato, lembra que, o pasado 15 de maio deste ano, veñen de cumprirse 99 anos desde que o Concello de Conxo incorporouse ao Concello de Santiago de Compostela, polo que no 2025 celebraremos o centenario desta efeméride, “que consideramos debe ser recordada e posta en valor diante da cidadanía compostelá”.

Por este motivo, a popular considera que esta data é merecedora da celebración dun Pleno neste emblemático barrio, para o que se podería empregar o Mosteiro que alí se ubica, ademais de que se organice unha programación cultural.

María Baleato lembra que Conxo foi un concello independente desde o ano 1835 ata o 1925 e incluía as parroquias de Aríns, O Eixo, Bando, Marrozos, Villestro, Laraño, Figueiras e unha boa parte da zona do Ensanche, contaba tamén co seu propio xulgado e mesmo con estación de tren, pero foi a expansión do núcleo urbano de Santiago o que provocou que se tivese que incorporar ao territorio da capital de Galicia.

Nas súas rúa, Conxo preserva unha historia chea de cultura e momentos que marcaron a historia do Concello de Santiago e que non debemos esquecer, como o Castriño de Conxo; o Mosteiro coa súa Igrexa; o Castelo da Rocha Forte; o Banquete Histórico de Conxo, con Eduardo Pondal e Aurelio Aguirre entre os participantes; o primeiro psiquiátrico, situado nas instalacións do Mosteiro; e o primeiro ferrocarril de Galicia, que unía Cornes con Carril.

Conxo, onde se construíron novas zonas residencias, está a sufrir unha metamorfose que o ten convertido nun símbolo de revitalización e modernización, ademais de ser un barrio cheo de vida e de celebracións festivas, que preserva o seu encanto e mantén a súa identidade cultural.