O PP esíxelle a Sanmartín que demostre que medidas tomou tras os vertidos da nova depuradora

• Adrián Villa reclamoulle á alcaldesa que “recite o cronograma da súa inacción, do seu pasotismo e, o máis importante, que diga como ten pensado levar a cabo a recuperación do río Sar, logo deste atentado medioambiental”.
• “Dada a gravidade da situación -salientou Villa- apoiamos a iniciativa doutras administracións, na que non está incluído o Concello de Santiago, de denunciar ante á Fiscalía de Medio Ambiente esta neglixencia”.

O concelleiro do Partido Popular de Santiago, Adrián Villa, vén de esixirlle a Goretti Sanmartín que “recite, ensine e demostre que medidas tomou ese día 1, ese día 11 de outubro, co fin de parar os vertidos procedentes das obras da nova depuradora da Silvouta” e que explique que “responsabilidades vai asumir como alcaldesa».

Villa explicou que “comparecemos para pedir explicacións tras 12 días de silencio absoluto, 12 días dunha falta de información e transparencia sen precedentes, 12 días nos que arrasaron co río Sar, unha contorna que forma parte da Rede Natura 2000, é dicir, con protección a nivel europeo, pola súa riqueza ambiental”.

O edil popular destacou que “todo isto, ocorreu coa complicidade do goberno nacionalista que, desde o minuto 1, mirou cara a outro lado, non deu explicacións e non tomou ningunha medida para evitar que isto seguise sucedendo”.

Así mesmo, o popular reclamoulle á alcaldesa que “recite o cronograma da súa inacción, do seu pasotismo e, o máis importante, que diga como ten pensado levar a cabo a recuperación completa do río Sar, logo deste atentado medioambiental”.

“Dada a gravidade da situación -salientou Villa- apoiamos a iniciativa doutras administracións, na que non está incluído o Concello de Santiago, de denunciar ante a Fiscalía de Medio Ambiente esta neglixencia”.

O edil popular amosou a súa preocupación por esta alarmante situación e emulando ás propagandas contra a instalación de Altri, presentouse dicindo: “son Adrián Villa e a miña cidade, Santiago, está en perigo, por non dicir tamén Ames, Brión, Rois, Padrón, o río Ulla e a ría de Arousa”.

“E pregúntome -dixo- onde está Greenpeace?, onde está Adega?, onde están Luís Zahera, Martiño e Manuel Rivas? ou onde están todas as asociacións do parque temático do BNG?, onde está o BNG coas pancartas do seu, polo que vemos, ecoloxismo de postureo?”.

Villa incidiu en que “chama a atención ver como gritaron nos últimos meses para defender á ría de Arousa, na que desemboca un Ulla que ía “arrasar” e “colapsar” o ecosistema por culpa dunha industria en Palas de Reis e, en cambio, parece que nada pasa porque o río Sar, que desemboca na mesma ría, acabe contaminado con materia orgánica de residuos fecais”.

“O de Altri, -subliñou- formaba parte da factoría dos bulos do BNG, pero o arrase do ecosistema do Sar é unha triste e preocupante realidade; a diferenza é clara, no primeiro caso a falsa responsabilidade é da Xunta de Galicia que goberna o Partido Popular e, no segundo, a verdadeira responsabilidade é do Concello de Santiago, que goberna o BNG, por iso, os antes acusadores, agora gardan silencio absoluto”.

Adrián Villa insistiu en que estamos “ante un atentado medioambiental, tal e como tamén denuncian alcaldes e voceiros doutras formacións políticas, por certo, socios do BNG e da señora Sanmartín”.

O popular lembrou que esperaron a este luns, 20 de outubro, nove días despois do vertido, para celebrar unha reunión na que, ante a falta de capacidade do goberno nacionalista, se solicitou un plan de continxencia para evitar máis vertidos; e tamén foi este luns cando o goberno de BNG e CA considerou oportuno analizar os incumprimentos na autorización do vertido e onde Augas de Galicia lle tirou das orellas ao BNG, por non ter cumprido os protocolos de traballo e ter unha clara falta de coordinación para as fases de funcionamento da depuradora.

“Volvendo a este luns, 9 días tras o vertido, – engadiu Villa- Goretti Sanmartín tivo a caradura de dicir que “actuou desde o primeiro momento”, polo que nos preguntamos como pode mentir así?, porque todos sabemos que ata entón non se activou o proceso físico-químico completo que substituíse, alomenos parcialmente, o proceso biolóxico en execución”.

Finalmente, o edil popular agregou que “agardamos explicacións pormenorizadas de Goretti Sanmartín sobre o cronograma do desastre ambiental no río Sar e, por suposto, a que asuma a súa responsabilidade como alcaldesa de Santiago deste atentado ambiental sen precedentes”.