O PP de Santiago denuncia o abandono da estrada de Sarela de Abaixo

• Segundo explicou Nerea Barcia, os residentes da zona están cansos de presentar queixas por diferentes vías ante o Concello sen obter unha resposta efectiva.
• «Imos seguir levando a voz dos veciños a veciña ao Pleno e a onde faga falta. Esta situación é insostible e require unha solución inmediata. Non se pode gobernar a base de promesas que nunca se cumpren», salientou a edil popular.

A concelleira do Partido Popular de Santiago, Nerea Barcia, denunciou hoxe o lamentable estado da estrada de Sarela de Abaixo e criticou a pasividade do Goberno local, que malia prometer ser dialogante e atender as peticións veciñais, continúa sen ofrecer solucións reais a unha demanda urxente.

«O BNG presume de ser un goberno que escoita á veciñanza, pero a realidade é ben distinta. Os veciños e veciñas de Sarela de Abaixo levan moito tempo reclamando unha actuación nesta estrada e, ata o de agora, só recibiron promesas baleiras», afirmou Barcia.

Segundo explicou a concelleira popular, os residentes da zona están cansos de presentar queixas por diferentes vías ante o Concello sen obter unha resposta efectiva. A estrada, cada vez máis transitada, presenta numerosas fochancas e carece de espazos seguros para apartarse, supoñendo un risco para vehículos, peregrinos, ciclistas e transeúntes.

«Esta vía non precisa un simple rebacheado, senón un asfaltado completo. O único que reciben é grava e a indicación de que ‘a vaian botando segundo lles faga falta’. Isto é unha falta de respecto á veciñanza», denunciou Nerea Barcia.

A concelleira insistiu en que «desde o PP de Santiago imos seguir reclamando eses arranxos, tivemos a oportunidade de escoitar directamente aos veciños e veciñas afectados e imos seguir levando a súa voz ao Pleno e a onde faga falta. Esta situación é insostible e require unha solución inmediata. Non se pode gobernar a base de promesas que nunca se cumpren».

Barcia esixiu ao Goberno municipal do BNG que actúe dunha vez por todas e que priorice o benestar da cidadanía por riba das palabras:

«Os veciños xa non cren nas escusas. Queren feitos. E desde o Partido Popular imos estar ao seu carón ata que se dea unha resposta digna.»