O PP de Santiago abre a porta a unha moción de censura con Mercedes Rosón como alcaldesa
O Partido Popular de Santiago amósase disposto a negociar unha moción de censura cos concelleiros non adscritos —expulsados do PSOE— para promover o que cualifican como “un goberno de emerxencia” na capital galega e retirar o bastón de mando á actual alcaldesa do BNG, Goretti Sanmartín.
Líder Redacción
9 de octubre de 2025 a las 16:02
Segundo avanzou Borja Verea, voceiro municipal do PP, nunha entrevista concedida a Onda Cero, o obxectivo é “acabar co caos e a parálise” que, segundo di, padece o Concello de Santiago. Verea non descartou que a candidata á Alcaldía sexa Mercedes Rosón, exconcelleira socialista e actualmente edil non adscrita, por ser “a única opción viable” que contaría co apoio necesario.
O presidente provincial do PP e conselleiro de Presidencia, Diego Calvo, confirmou tamén ante os medios a disposición do partido a explorar esta vía, subliñando que a “única preocupación” dos populares é a cidade de Santiago e non “o sillón” da Alcaldía.
O PP compostelán propón un decálogo de medidas prioritarias para ese hipotético goberno de emerxencia, que estaría formado por 15 concelleiros. Entre elas destacan:
1. O derrubo da Casa da Xuventude.
2. A eliminación dos asesores e cargos creados polo BNG e Compostela Aberta, destinando eses fondos á programación cultural.
3. O reforzo inmediato do servizo de limpeza.
4. A posta en marcha dun novo contrato da auga “que xeraría 100 millóns de euros para os santiagueses”.
5. A auditoría do servizo de autobuses urbanos.
6. A axilización administrativa e urbanística.
7. A creación dunha rede pública de cociñas escolares.
8. A construción de vivenda “cen por cen pública” e a paralización da venda de solo público.
9. A instalación de parques infantís cubertos.
10. O reforzo da plantilla da Policía Local e medidas complementarias de seguridade.
Con esta proposta, os populares aseguran querer “recuperar a estabilidade institucional” en Santiago tras meses de tensión entre o goberno municipal do BNG e os concelleiros non adscritos, antigos membros do grupo socialista.
Non obstante, a concelleira Mercedes Rosón asegurou a El Correo Gallego que “xamais” formará un goberno de coalición co Partido Popular, e subliñou que “o PP coñece perfectamente” a súa postura, desbotando así a posibilidade de liderar esa hipotética moción de censura.
