O Pino ultima a instalación do contedor marrón en Pedrouzo

 

 

• A previsión é que os colectores para residuos orgánicos estean plenamente operativos a partir do venres 26 de xaneiro
• As persoas que queiran colaborar na reciclaxe deberán solicitar no Concello unha copia da chave para abrir estes contedores

O Pino.18-1-2024.- O Concello do Pino está a piques de completar a instalación dos contedores marróns no núcleo urbano de Pedrouzo. A vindeira semana, estes colectores específicos para residuos orgánicos estarán operativos, marcando un paso crucial cara a xestión sostible dos residuos no municipio.

Os colectores adicionais serán colocados ao lado dos contedores actuais, nas illas de reciclaxe xa instaladas. No caso das illas subterráneas, os novos contedores quedarán na superficie, ao seu carón. Neste momento, o Concello está a colocar as barras necesarias para ancorar os novos colectores.

Os contedores marróns contan cun sistema de chave para garantir unha xestión eficaz dos residuos orgánicos. As persoas interesadas en participar nesta iniciativa de reciclaxe deben achegarse ao Concello para solicitar unha copia da chave, proporcionando datos persoais como DNI, número de teléfono e dirección do domicilio.

A previsión é que os contedores marróns estean plenamente operativos a partir do venres 26 de xaneiro. Os hostaleiros que fixeron a súa solicitude xa recibiron os seus contedores, cumprindo así co compromiso previamente establecido polo Concello. Por outra banda, as comunidades de propietarios interesadas en integrar os contedores marróns nas súas instalacións tamén poden presentar a súa solicitude no Concello para recibir este servizo.

Esta acción segue á charla informativa realizada no pasado mes de decembro, na cal unha técnico de Sogama lle explicou á veciñanza a importancia da recollida selectiva e como realizar unha correcta separación de residuos no fogar. O obxectivo é contribuír á recuperación do 40% da composición media dunha bolsa de lixo tipo, correspondente a materia orgánica.

Ademais dos contedores marróns, o Concello tamén distribuirá composteiros domésticos nas vivendas unifamiliares, proporcionándolles así ás familias unha ferramenta para facer compost e contribuír á redución de residuos.

Para unha reciclaxe idónea, a veciñanza debe prestar especial atención á correcta separación dos residuos, asegurando que o 95% dos materiais depositados nos contedores marróns sexan compostables.

Na charla informativa, a técnico de Sogama subliñou os elementos que deben ser depositados no contedor marrón, como restos de alimentos, peladuras, restos de pasta, sementes e outros materiais compostables. Tamén aclarou que as bolsas utilizadas para tirar materia orgánica deben ser biodegradables ou compostables.

Quedan excluídos do contedor marrón materiais como aceite de cociña, compresas, papel hixiénico, ramas de podas, entre outros. A veciñanza está convidada a seguir estas indicacións para asegurar o éxito desta iniciativa de reciclaxe no Pino.