O Pino destinará ao SAF os 93.778 € do POS+ adicional para gastos sociais extraordinarios
Líder Redacción
22 de diciembre de 2025 a las 12:22
- Servirán para rebaixar a achega de 243.000 euros que se prevé terá que facer o Concello para sufragar as 25.000 horas de atención previstas
- No último pleno ordinario do ano tamén se aprobou o proxecto para senda peonil de Regas ao cruce de Casal cun orzamento de 118.158 euros
O Pino. 22-12-2025.- O Concello do Pino destinará a sufragar o Servizo de Axuda no Fogar os 93.778,69 euros que lle corresponden da achega provincial do POS+ Adicional para gastos sociais extraordinarios. Esta partida servirá para rebaixar os 243.257,76 euros que ten reservado o goberno municipal para financiar o SAF. O pleno celebrado o 19 de decembro tamén aprobou o proxecto da senda peonil de Regas ao cruce de Casal, cun orzamento de 118.158 euros.
O Pino ten reservada unha partida de 591.257,12 euros no orzamento do ano que ven para financiar o Servizo de Axuda no Fogar. A estimación municipal é que se prestarán un máximo de 25.072 horas para atender a veciñanza que ten recoñecida a dependencia, tal e como figuraban na licitación deste servizo.
Do orzamento total, o Concello recibirá unas 300.864 euros da Xunta de Galicia e outros 47.135 euros corresponde ao copago que fan as persoas usuarias. Salvo que o goberno autonómico incremente os 12 euros/hora que paga actualmente, como se prevé que ocorra en 2026, o SAF supón para o Concello un desembolso de 243.257,76 euros anuais.
En base ao informe realizado polos Servizos Sociais municipais, o goberno que preside Manuel Taboada propúxolle ao Pleno destinar os 93.778,69 euros do POS+ adicional para gasto social extraordinario a financiar unha parte da aportación que fai o Concello para o SAF. A proposta foi aprobada por unanimidade.
Na última sesión ordinaria deste ano, o Pleno tamén aprobou por unanimidade o proxecto para construír unha senda peonil de Regas ata o cruce de Casal, cunha lonxitude de 540 metros e 1,8 metros de ancho, que levará 15 centímetros de zahorra e 5 cm de aglomerado en quente. O orzamento ascende a 118.158,35 euros.
O alcalde explicou que esta obra “executarase cunha subvención nominativa da Deputación, que vai financiar o 80% da obra, e que permitirá continuar a senda xa existente que remata en Regas”.
