O goberno municipal de Dodro traballa na aprobación definitiva dunha nova RPT

• O pasado mes de maio levouse a pleno unha modificación consensuada da Relación de Postos de Traballo que foi finalmente retirada do pleno.

Dodro, 21 de decembro do 2023.- O goberno municipal de Dodro están mantendo reunións con tódolos grupos políticos co fin de chegar a un acordo amplo co fin de ampliar e mellorar a Relación de Postos de Traballo do concello.

No pleno do 7 de xuño decidiuse retirar da orde do día a modificación número 1 da Relación de Postos de Traballo dado que o goberno municipal estaba en funcións despois das eleccións do 28 de maio.

Aquel documento viña cunha aprobación inicial, polo que parece que tiña garantido un apoio suficiente que o goberno municipal espera que se manteña en esta ocasión. A nova distribución política do pleno municipal levou á necesidade das actuais reunións coas que se quere atopar aquela maioría ou, se fose posible, aumentala.

O goberno municipal lembra que esta modificación é precisa xa que supón habilitar novos postos de traballo necesarios para o funcionamento do concello. Servirá tamén de punto de partida para a negociación dun novo convenio laboral co que se pretende mellorar a situación laboral e económica de todos os traballadores.

Atopar o acordo entre os grupos pode servir de marco para acadar novos consensos que fagan avanzar a Dodro. Ao mesmo tempo é algo que os mesmos traballadores do concello reclaman e que non pode agardar máis.