O F.C. Meigas e o presidente da Confraría da Madalena, pregoeiros de Ames en Festas 2024

Este  martes mantívose unha xuntanza para organizar as festas e mailo operativo de seguridade que se manterá activo durante os 10 días de festexos. Estará coordinado pola Policía Local e nel colaborará o persoal da Agrupación de Protección Civil

O martes, 6 de agosto, no arque verde central do Milladoiro (que se atopa ao carón do pavillón polideportivo e da piscina descuberta) vaise celebrar unha festa infantil con diferentes actividades pensadas para os rapaces e rapazas. Esta mesma festa repetirase en Bertamiráns o sábado 10 de agosto no parque do Ameneiral

Ames, 30 de xullo de 2024.- A programación de Ames en Festas 2024 está a piques de comezar. Serán 10 días de festas seguidos, primeiro no Milladoiro, do venres 2 ao martes 6, e despois en Bertamiráns, do mércores 7 ao domingo 11 de agosto. As mellores orquestras de Galicia pasarán por Ames Este ano como novidade haberá dous pregóns, un de inicio nas festas, no Milladoiro, o sábado 3 de agosto a cargo de Alberto Gómez, presidente da Confraría da Madalena do Milladoiro; e outro de peche das festas, en Bertamiráns, o domingo 11 de agosto durante a sesión vermú, que ofrecerá o Fútbol Club Meigas. Esta mañá mantívose unha xuntanza para organizar o operativo de seguridade que se manterá activo durante os 10 días de festas.

O vindeiro venres, 2 de agosto, comeza a programación de Ames en Festas 2024. Serán de 10 días de festexos, dende o venres 2 ata o domingo 11 de agosto, nas localidades do Milladoiro e Bertamiráns. Na organización de dita programación colaboran o Concello de Ames, as comisións de festas da Madalena e da Peregrina, e a Xuntanza de Empresarios de Ames.

As mellores orquestras de Galicia pasarán por Ames: Panorama, Gran Parada, Metrópolis, Combo Dominicano, París de Noia, Os Satélites e Los Coleguitas. Tamén haberá concertos a cargo de Guadi Galego, do grupo La Banda de Ayer e Tania Veiras. Este ano como novidade haberá dous pregóns, un de inicio das festas, no Milladoiro, o sábado 3 de agosto, e outro de peche, en Bertamiráns, o domingo 11 de agosto durante a sesión vermú.

Deste xeito, o pregón de inicio das festas, no Milladoiro, será a cargo de Alberto Gómez, presidente da Confraría da Madalena do Milladoiro, mentres que o de peche das festas, en Bertamiráns, ofrecerao o Fútbol Club Meigas, en representación do deporte feminino do concello.

Operativo de seguridade para as festas

Esta mañá mantívose unha xuntanza para organizar as festas e mailo operativo de seguridade que se manterá activo durante os 10 días de festas. En dita reunión de traballo participaron o alcalde e concelleiro de Cultura, Blas García; o concelleiro de Obras e Servizos Básicos, Gustavo Nieto; a técnica do departamento municipal de Cultura, María Vázquez; o responsable da brigada municipal de obras, Juan Calvo; representantes das comisións de festas do Milladoiro e de Bertamiráns; persoal de Xuntanza de Empresarios de Ames e da empresa Cunde; o oficial da Policía Local de Ames e persoal da Agrupación de Protección Civil.

En dita xuntanza pecháronse os últimos detalles sobre a organización das festas e tamén se presentou o operativo de seguridade que estará coordinado pola Policía Local e no que colaborará o persoal da Agrupación de Protección Civil.

Festa infantil para a rapazada

Ademais, esta mañá pechouse a organización de dúas festas infantís dirixidas aos nenos e nenas e ás súas familias, que se enmarcan dentro da programación das festas do Milladoiro e de Bertamiráns.

O martes, 6 de agosto, no parque verde central do Milladoiro (que se atopa ao carón do pavillón polideportivo e da piscina descuberta) vaise celebrar unha festa infantil con diferentes actividades pensadas para os rapaces e rapazas. Esta mesma festa repetirase en Bertamiráns, o sábado 10 de agosto, no parque do Ameneiral.