O Consello Escolar aproba por unanimidade o novo nome de CEIP da Almáciga

Segundo explica a ANPA, a iniciativa non responde a motivacións partidistas nin a decisións improvisadas, senón que é o resultado de dous cursos académicos de reflexión e participación por parte da comunidade educativa. A unanimidade acadada no órgano colexiado do centro, sinalan, amosa un consenso amplo que consideran debe ser respectado.

A asociación lembra tamén a súa traxectoria histórica en defensa do colexio, destacando mobilizacións e iniciativas impulsadas ao longo das últimas décadas para garantir a continuidade do centro, mellorar as instalacións, recuperar espazos do edificio e promover proxectos vinculados á igualdade, á lingua galega e á convivencia. Enmarcan o cambio de denominación dentro desta mesma liña de compromiso coa educación pública e coa participación activa das familias.

Desde a ANPA recoñécese o valor simbólico que o nome “Apóstolo Santiago” ten para parte da comunidade, motivo polo que —aseguran— o proceso foi “coidadoso e rigoroso”, dando cabida á diversidade de opinións. Ao mesmo tempo, destacan que o topónimo Almáciga, documentado xa no século XVI, está ligado directamente ao barrio no que se sitúa o centro, polo que consideran que a súa recuperación reforza a conexión entre a escola e a súa contorna.

A decisión definitiva dependerá agora do pleno municipal. Con todo, a ANPA insiste en que o procedemento seguido foi legal, democrático e transparente, e pide que se respecte o resultado adoptado polos órganos do centro. Así mesmo, amosa a súa preocupación polas interpretacións que, ao seu xuízo, trasladan unha confrontación allea ao ámbito educativo.

A entidade conclúe reafirmando o seu compromiso cunha escola pública inclusiva, plural e de calidade, e anuncia que continuará traballando na mesma liña de participación e defensa do ensino público que vén mantendo ata o de agora.