O BNG demanda a paralización do macroproxecto mineiro na comarca de Ordes
Presentou alegacións tanto como BNG, como de veciños e veciñas, coincidindo co remate do prazo
Líder Redacción
4 de julio de 2024 a las 15:06
Santiago, 4 de xullo de 2024.- Esta mañá presentáronse alegacións tanto como BNG, como individuais, para frear a explotación da mina a ceo aberto proxectada por ERIMSA na comarca de Ordes, afectando aos concellos de Ordes, Oroso, Frades e Mesía. Un macroproxecto mineiro de extracción de seixo, no que se pretende eludir o grave impacto que terá ao se presentar só unha parte do conxunto, deixando o resto como proxectos fragmentados.
O BNG da comarca de Compostela denuncia que a explotación que pretende levarse a cabo “vén sendo unha continuación da lista de despropósitos que a empresa ERIMSA veu cometendo nos concellos da comarca ao longo da historia”, con vertidos recorrentes da balsa de lixiviados que a empresa ten en Frades, denuncias continuadas sobre a extracción de seixo en diferentes parcelas, sen as licencias e autorizacións preceptivas ou co abandono de diferentes zonas nas que explotou os recursos deixando os terreos sen restaurar.
Por isto, e polas alegacións presentadas -que se remiten en documento adxunto-, o BNG entende que “debe concluírse que non se pode aprobar esta concesión derivada do permiso de investigación ANDREA 7137”. Considera, canda isto, que o proxecto incumpre a Lei de Ordenación da Minaría de Galiza, porque non fai referencia aos núcleos de poboación, industria, elementos etnográficos, nin patrimonio histórico-artístico ou fraxilidade visual.
Forte impacto socio-económico
O BNG alerta do forte impacto socio-económico que o Proxecto ANDREA 7137 terá na zona na que pretende asentarse, xa que atinxe aos concellos de Frades, Mesía, Ordes e Oroso. Un total de 2.500 ha. nas que afecta a 93 explotacións agropecuarias, fundamentalmente lácteas.
Fronte a isto, o BNG defende que a actividade agrogandeira prevaleza sobre os usos mineiros. Máis logo de terse declarado de utilidade pública a concentración parcelaria na zona. Advirte da colisión de dereitos no relativo ás concesións de augas, alén do impacto sobre o ciclo hidrolóxico dos solos afectados, ao se incrementar a escorrentía superficial e arrastre do solo por erosión. Isto ademais do impacto sobre a calidade das augas e sobre a biodiversidade agraria.
Por iso reitera a súa oposición ao proxecto e conclúe que “a relación custos-beneficios fai que non sexa positiva a aprobación de proxectos destas características”.