O amesán Iván Gutiérrez Mosquera, campión galego de ximnasia rítmica cadete

O obxectivo marcado por Iván e pola súa adestradora é ser campión de España. O deportistas amesán acadou en 2024 a medalla de bronce no campionato nacional de ximnasia rítmica individual. Esta era a súa primeira participación no campionato nacional a nivel individual. Ademais, no ano 2023 foi prata en ximnasia acrobática por parellas

Ames, 3 de abril de 2025.- Iván Gutiérrez Mosquera, nado en Ames en 2010 e pertencente ao Club Ximnasia Rítmica Compostela, vén de acadar o campionato galego de ximnasia rítmica na categoría cadete. Deste xeito, clasificouse para o campionato de España que se celebrará este mes de abril en Guadalajara. O deportistas amesán acadou en 2024 a medalla de bronce no campionato nacional de ximnasia rítmica individual e no ano 2023 foi prata en ximnasia acrobática por parellas.

O pasado 9 de marzo o amesán Iván Gutiérrez Mosquera acadou o campionato galego base individual masculino de ximnasia rítmica da Xunta de Galicia, que se disputou no pavillón municipal de Baltar, en Sanxenxo. O deportista amesán acadou unha nota final de 18 puntos. Isto permítelle participar no campionato de España que se celebrará do 8 ao 13 de abril no Palacio multiusos de Guadalajara.

Iván Gutiérrez competirá o domingo 13 de abril. Iván Gutierrez mostrouse, nos micrófonos de Ames Radio, moi satisfeito co resultado obtido no campionato galego. “Ía un pouco nervioso porque quería emocionar ao público e que lle gustase a miña montaxe. Ao final saíume moi ben e estou moi contento co resultado que conseguín”. Tamén explica que neste campionato competiu na modalidade individual, pero que tamén competirá a nivel grupal no campionato galego nos próximos meses.

Comezou a practicar ximnasia acrobática aos 4 anos

O deportista amesán indica que aos catro anos comezou a practicar ximnasia acrobática, pero despois aos 11 anos comezou a facer ximnasia rítmica e estivo compatibilizando durante dous anos as dúas modalidades, ata que tivo que escoller e se decantou pola ximnasia rítmica. Na actualidade adestra arredor de vinte horas á semana (os luns, mércores, xoves, venres e sábados).

Tamén explica que dende o pasado mes de setembro está preparando a montaxe coa que competiu no campionato galego e tamén vai levar ao campionato de España. Está composta por riscos (lanzamentos feitos cun aparato); mestrías (pequenos lanzamentos); dificultades (saltos e equilibrios).

O obxectivo marcado por Iván e pola súa adestradora é ser campión de España. O deportistas amesán acadou en 2024 a medalla de bronce no campionato nacional de ximnasia rítmica individual. Esta era a súa primeira participación no campionato nacional a nivel individual. Ademais, no ano 2023 foi prata en ximnasia acrobática por parellas.