O alcalde do Pino pídelle á Xunta que autorice facer esperas para controlar o exceso de lobos
• Manuel Taboada recorda que hai numerosos ataques ao gando vacún e ovino na metade das parroquias do municipio
• Solicita á Consellería de Medio Ambiente cales son os pasos a seguir para que o Tecor A Magdalena poida tramitar as autorizacións necesarias
• Os gandeiros xa lle solicitaran esta medida á conselleira o pasado mes de decembro en Lardeiros
Líder Redacción
18 de mayo de 2025 a las 13:10
O Pino. 16-5-2025.- Os gandeiros de seis parroquias do Pino están moi preocupados polos constantes ataques do lobo, que mata vacas e ovellas, dun xeito máis reincidente en Lardeiros, Pastor, Medín, Gonzar, San Breixo e Cerceda. Unha vez que se levantou a protección do lobo no listado Lesrpe, o alcalde pídelle á Consellería de Medio Ambiente que autorice ao Tecor A Magdalena poder facer esperas para controlar a poboación de lobos.
Nunha carta remitida á conselleira Ánxeles Vázquez, o alcalde do Pino solicita que se informe ao Concello dos pasos a seguir para que o Tecor A Magdalena poida tramitar as peticións e autorizacións pertinentes, conforme á normativa vixente, para facer as esperas e axudar a controlar a poboación dos lobos.
O Comité Permanente do Convenio de Berna do Consello de Europa aprobou en decembro cambiar o estatus internacional do lobo en Europa, pasando de especie estritamente protexida a protexida.
Agora en que España tamén se modificou o Listado de especies silvestres de réxime de protección especial (Lesrpe) para o Lobo, dende o Concello do Pino solicitan o apoio da Consellería de Medio Ambiente e Cambio Climático para que autorice ao Tecor A Magdalena a evitar a excesiva presenza do lobo no municipio e colaborar, deste xeito, cos gandeiros do Pino.