O alcalde do Pino acompaña a veciña Dolores Ferro na celebración do seu centenario
Líder Redacción
6 de abril de 2026 a las 13:39
Pola esquerda: Gerardo Pintor, Consuelo, Dolores Ferro Seijo, o seu fillo Manuel e o alcalde, Manuel Taboada Vigo
O Pino.6-4-2026.- A veciña do lugar de Veirán, na parroquia de Gonzar, Dolores Ferro Seijo, celebrou o pasado 4 de abril o seu 100 aniversario arroupada polo cariño da súa familia e das persoas máis próximas.
A centenaria compartiu este día tan especial co seu fillo Manuel, coa súa nora Consuelo e coa súa neta Lola, cos que convive na actualidade, así como con amigos, veciños da parroquia e coa súa irmá, desprazada desde Bilbao para a ocasión. A familia organizoulle unha festa sorpresa que fixo desta xornada unha celebración moi emotiva.
Ata o lugar desprazouse tamén o alcalde do Pino, Manuel Taboada, acompañado do concelleiro Gerardo Pintor, quen quixeron sumarse á homenaxe facendo entrega dun ramo de flores en nome de toda a veciñanza.
Desde o Concello do Pino trasladan a Dolores Ferro os seus parabéns por acadar esta destacada efeméride, ao tempo que poñen en valor o papel das persoas maiores como depositarias da memoria, da experiencia e da identidade colectiva do municipio.