O alcalde de Ordes gasta case 340.000 euros en obras executadas mediante «contratos verbais»
O alcalde de Ordes viuse forzado a levantar un reparo formulado Intervención municipal, a cal no seu informe determina a “ausencia total e absoluta de procedemento (contratación verbal) e carencia absoluta de crédito”, detectando ademais a existencia de “infraccións do ordenamento xurídico que constitúe unha infracción administrativa moi grave en materia de xestión económica orzamentaria”.
Líder Redacción
31 de octubre de 2025 a las 11:28
Desde o BNG, consideran este xeito de operar por parte do alcalde como “irresponsable e totalmente impropio na xestión dos fondos públicos”. O voceiro da formación nacionalista, Pablo Vidal, apunta que “no ámbito privado, unha persoa pode contratar empresas sen presuposto para facer as obras que estime oportunas e logo pagarlle a nota que lle pasen, pero na administración pública, débense aplicar os procedementos regulados na lei de contratos do sector público, velando pola concorrencia competitiva e a igualdade de oportunidades, así como someterse á fiscalización da intervención municipal”. Semella que temos un alcalde “que pensa que os cartos da veciñanza son seus, e pode facer con eles o que lle pete”, opina o portavoz do bloque.
Para Vidal, trátase dunha “grave imprudencia do alcalde que pon en risco mesmo o pago ás propias empresas que executan os traballos, tendo que recorrer a levantar os reparos impostos pola intervención municipal a este nefasto xeito de proceder”, e considera que a situación revela “a total improvisación do goberno municipal, que aproba os presupostos a mediados de ano e que poucos meses despois atópase cunha carencia absoluta de crédito para afrontar o pago destas obras irregularmente contratadas”.
Deste xeito, o bloque votou en contra tanto do recoñecemento extraxudicial de créditos coma da modificación créditos precisa para “financiar o pagamento de 340.000 € en 20 obras contratadas verbalmente polo alcalde” manifestando que “non imos de ningunha maneira, a ser cómplices das irregularidades cometidas polo alcalde”.