Os Enxeñeiros Industriais entregan este venres os Premios de Industria e Enerxía de Galicia 2026

• O Ilustre Colexio de Enxeñeiros Industriais de Galicia e a AIIGentregan mañá os galardóns que recoñecen a excelencia industrial, enerxética e medioambiental en Galicia na Gala da Industria e Enerxía de Galicia, en Santiago de Compostela
• Estrella Galicia, Voltfer, Aluminios Cortizo, XEAL e Litosoil, entre os galardoados desta edición
• A gala reunirá no Auditorio Abanca a representantes institucionais, empresas líderes e profesionais de referencia do sector industrial e enerxético galego

A Coruña, 4 de xuño de 2026. O Ilustre Colexio Oficial de Enxeñeiros Industriais de Galicia (ICOIIG) e a Asociación de Enxeñeiros Industriais de Galicia (AIIG) celebrarán mañá venres 5 de xuño a Gala da Industria e Enerxía de Galicia 2026, un encontro que recoñecerá ás empresas, entidades e profesionais que destacan pola súa contribución ao desenvolvemento industrial, enerxético e medioambiental de Galicia.

Durante o acto entregaranse os Premios de Industria e Enerxía de Galicia 2026, cuxos máximos recoñecementos recaeron en Estrella Galicia, pola súa nova fábrica en Arteixo; Voltfer, por un proxecto de autoconsumo fotovoltaico industrial en Porriño; Aluminios Cortizo, polo seu Campus Tecnolóxico de Padrón; XEAL, pola modernización da Central Hidroeléctrica de Fervenza; e Litosoil, polo seu innovador sistema de valorización de solos contaminados.

Así mesmo, recoñecerase a traxectoria profesional de José Luis Alonso Mosquera, director de Stellantis Vigo, e entregaranse os Premios de Seguridade Industrial á Axencia de Turismo de Galicia e a Talleres Marcos Gómez, S.L.

A gala contará coa participación de destacados representantes institucionais, entre eles Julio García Cordonié, decano do ICOIIG e presidente da AIIG, o secretario xeral de Industria e Desenvolvemento Enerxético da Xunta de Galicia, Nicolás Vázquez Iglesias; a directora xeral de Estratexia Industrial e Solo Empresarial, Margarita Ardao Rodríguez; o delegado do Goberno en Galicia, Pedro Blanco Lobeiras; representantes da Deputación da Coruña, así como responsables do ICOIIG e da AIIG, como Rocío Lourenco Presa, delegada do ICOIIG en Santiago, xunto a directivos das empresas galardoadas e representantes do tecido industrial e enerxético galego.