Juan Lois, director de Cores e Sons: «Este campamento é moito máis que música, é unha experiencia vital»
Do 14 ao 18 de xullo, Santa Cruz de Ribadulla (Vedra) converterase no escenario do campamento musical “Cores e Sons”, unha iniciativa da Fundación Sanganxa dirixida polo recoñecido músico galego Juan Lois. A proposta, pioneira en Galicia, ofrecerá formación musical intensiva e actividades centradas nos valores humanos, cun concerto final aberto ao público.
Líder Redacción
24 de junio de 2025 a las 15:41
En entrevista con Sara Garea en Radio Líder Santiago, Juan Lois explicou que o campamento está pensado para rapaces e rapazas a partir de 9 anos, sen límite de idade, e sen esixir un nivel concreto. “Non buscamos tanto unha idade como un nivel e unha actitude, incluso xa temos inscricións de adultos”, comentou. “Queremos que os participantes vivan unha semana musical, divertida e chea de experiencias humanas. Isto é moito máis que aprender a tocar.”
A actividade estará centrada na banda de música, con traballo instrumental por especialidades nas mañás e ensaios colectivos co repertorio común. “A temática é segredo, pero estará moi relacionada coas relacións sociais e o momento actual”, adiantou Lois, que quere sorprender aos participantes cunha proposta moderna e sensible.
O campamento contará cun equipo de profesionais novos, pero altamente cualificados e comprometidos. “É un equipazo: grandes músicos, mellores persoas, e con verdadeira paixón pola educación e a música”, afirmou o director. Ademais do contido musical, os participantes desenvolverán competencias como a cooperación, a convivencia e a creatividade. “O noso obxectivo non é só que toquen mellor, senón que vivan algo que lles quede dentro para sempre.”
A actividade rematará o venres pola tarde cun concerto aberto ao público, onde se mostrará o traballo desenvolvido durante a semana. Para Lois, este tipo de experiencias son fundamentais: “Eu síntome un privilexiado por poder dedicarme á música, pero se non puidera, seguiría facéndoo como hobby. Isto non é traballo, é vida.”
A inscrición está aberta ata o 30 de xuño a través da páxina oficial do campamento, onde tamén se pode consultar o currículo do profesorado. A Fundación Sanganxa, con sede en Valencia, leva 10 anos promovendo iniciativas sociais e culturais por toda España, e con “Cores e Sons” busca ofrecer acceso á música a todas as persoas, independentemente da súa situación ou idade.
