Investigan a morte violenta do propietario da Carnicería Chelo & Muñico, na Praza de Abastos

As forzas de seguridade están inmersas na investigación do presunto homicidio de António Costa, dono da «Carnicería Chelo & Muñico», que perdeu a vida esta madrugada na Praza de Abastos de Santiago de Compostela. Segundo as últimas informacións as autoridades detiveron xa aos tres sospeitosos, dous homes de nacionalidade venezolana e outro italiano.

Descártase o roubo como motivación, pois os agresores non se levaron o diñeiro que Costa levaba consigo. Diversas fontes especulan con dúas posibles causas para o incidente: un altercado accidental que terminou en violencia fatal ou unha disputa previa que se intensificou dentro da Praza de Abastos.

A alcaldesa de Santiago, Goretti Sanmartín, acompañada do concelleiro Xan Duro, expresou as súas condolencias dende o lugar dos feitos, onde sinalou a gravidade do ocorrido. Sanmartín pediu calma e asegurou que a investigación, baixo segredo de sumario, avanzará ata dar respostas. A Policía Nacional continúa coas dilixencias pertinentes, mentres que a autopsia da vítima e a declaración do membro de seguridade da Praza, serán claves para esclarecer as circunstancias do caso.

A Praza de Abastos reabriu, pero a conmoción entre os comerciantes era evidente. Ás 12:00, os praceiros convocaron un minuto de silencio en memoria da vítima, un acto ao que asistiron representantes da corporación local, nunha mostra de solidariedade co sector afectado e coa familia de Antonio Costa.