Guinarte denuncia que o BNG deixa sen cobrar horas extras e festivos a policías e bombeiros de Santiago

• Gumersindo Guinarte atribúe á falta de xestión  do goberno de Sanmartín que policías e bombeiros leven desde outubro sen cobrar as horas extra realizadas, sinalando que sen a boa vontade destes profesionais sería imposible manter uns servizos mínimos á altura dunha cidade como Santiago.

Santiago de Compostela, 17 de setembro de 2025. O voceiro do grupo municipal socialista, Gumersindo Guinarte, denunciou hoxe a situación insostible que está a vivir o persoal do Concello de Santiago, especialmente os policías e bombeiros. Segundo explicou, desde outubro do ano pasado, estes profesionais non recibiron o pago das horas extras realizadas, nin se lles abonaron algunhas festividades.

Guinarte subliñou que, a pesar destas circunstancias, os colectivos seguen a garantir os servizos da cidade “grazas á súa responsabilidade e boa vontade”, comprometéndose coa seguridade da cidadanía e co benestar dos seus compañeiros. “Sen ese esforzo, sería imposible manter uns servizos mínimos á altura dunha cidade como Santiago”, afirmou.

O voceiro socialista tamén destacou que esta situación non afecta só a policías e bombeiros, “moitos traballadores e traballadoras do Concello tamén realizan horas extras sen cobrar, o que evidencia unha falla grave de planificación e de compromiso por parte do goberno municipal da señora Sanmartín. Non pode ser que sexa a boa vontade do persoal a que manteña o funcionamento da cidade”.

Guinarte destacou que as e os socialistas consideran “inaceptable” esta situación e esixe que “se regularicen de inmediato todos os pagos pendentes e que se respecten os dereitos de todo o persoal municipal”.

Para concluír o veceiro engadiu que  “Santiago merece un goberno que cumpra coas súas responsabilidades e coas persoas que cada día garanten os servizos para os cidadáns e os cidadás”.