Goretti Sanmartín convida ao alcalde de Nova York a visitar Santiago

A alcaldesa de Santiago de Compostela, Goretti Sanmartín, anunciou que enviará unha carta ao alcalde de Nova York, Zohran Mamdani, convidándoo a visitar a capital galega. A rexedora explicou que este convite nace da vontade de compartir experiencias entre gobernos “que traballan polas maiorías sociais e por un mundo máis xusto e igualitario”.

Sanmartín subliñou que quen defende políticas transformadoras “enfróntase a poderes que tentan boicotear, insultar e afogar” os seus proxectos, polo que considera “importante establecer pontes de diálogo” con outras administracións que comparten esa visión progresista.

“Sería bo que puidésemos falar, que soubese desde o primeiro momento a que se enfronta, e que intercambiemos ideas, soños e proxectos que podemos desenvolver en cada cidade”, afirmou a alcaldesa.

A mandataria compostelá engadiu cun toque de humor que “é un bo momento para facelo, porque agora hai voo directo a Nova York”, en referencia á nova conexión aérea desde Galicia coa cidade estadounidense.