Gonzalo Muíños: “Nós só apoiaríamos unha moción de censura con Mercedes Rosón de candidata»
Santiago de Compostela, 8 de outubro de 2025. O grupo de concelleiros non adscritos no Concello de Santiago reitera a súa negativa a participar en calquera debate sobre unha posible moción de censura ao goberno local. Gonzalo Muíños, en representación dos catro edís, cualificou este mércores de “incomprensible” o “esforzo estéril dalgunhas persoas por insuflar un debate que está superado desde hai tempo” e no que, asegurou, nin el nin as súas compañeiras “quixemos participar nunca”.
Líder Redacción
8 de octubre de 2025 a las 15:13
“Nin nos sentimos interpelados nin cremos que sexa un debate que interese ás nosas veciñas e veciños, que o que queren é que traballemos para mellorar os servizos públicos, impulsar proxectos importantes e facer unha oposición esixente, pero útil e construtiva”, sinalou Muíños.
O edil insistiu en que os catro concelleiros manteñen a coherencia co seu compromiso electoral: “Temos un contrato asinado coas persoas que nos votaron, e ese contrato é o noso programa electoral, que está nas antípodas do programa do señor Verea”. Por iso, aclarou, “nós só apoiaríamos unha moción de censura na que a nosa compañeira Mercedes Rosón fora a candidata”, á que cualificou como “a única candidata alternativa posible” ao actual executivo.
Aínda que recoñecen que o goberno de Goretti Sanmartín “peca de soberbia vista a deficiente xestión” destes dous anos de mandato, os non adscritos deixan claro que non entrarán en “debates de sillóns”. “Queremos falar de vivenda, de servizos públicos e de investimentos nos nosos barrios e parroquias; eses son os únicos debates que nos interesan”, concluíu Muíños.