Gabriel Alén: “O gran reto do comercio galego é atraer á xente nova e adaptarse á dixitalización”

• O director xeral de Comercio e Consumo repasou en Radio Líder as medidas do Plan Estratéxico do Comercio de Galicia 2025-2030, as liñas de axuda, diferentes campañas de dinamización comercial, os premios ao comercio galego e a promoción da artesanía

O director xeral de Comercio e Consumo, Gabriel Alén, repasou en Radio Líder Santiago os principais retos e iniciativas para o sector, no marco do Plan Estratéxico de Comercio 2025-2030, aprobado en marzo cun orzamento global de 320 millóns de euros.

Segundo explicou, o plan naceu tras escoitar a preto de 300 representantes de asociacións, cámaras de comercio, prazas de abastos e consumidores, co obxectivo de trazar unha folla de ruta con 74 medidas centradas en tres eixos: a modernización e competitividade dos negocios, a visibilización do comercio local e a cooperación interinstitucional. “O comercio dá vida ás nosas cidades e vilas, pero afronta grandes dificultades. Non podemos competir cun negocio 100% en liña, pero debemos atraer á xente nova e mellorar a experiencia de compra”, destacou Alén.

Retos do sector

O director xeral salientou que Galicia conta con máis de 32.000 comercios, que xeran máis de 100.000 empregos, pero que afrontan cargas impositivas elevadas, alugueiros encarecidos, falta de relevo xeracional e a forte competencia da venda en liña. “O gran reto é adaptarse á dixitalización e captar a atención da mocidade, que merca case todo por internet”, afirmou.

Axudas unificadas para a modernización, dixitalización e sostibilidade

Alén explicou que a Xunta decidiu simplificar e unificar nunha soa orde anual todas as liñas de apoio ao comercio, que ata 2024 estaban dispersas en programas distintos. “O que fixemos foi facilitar a solicitude aos comerciantes, reunindo nunha única convocatoria todo o que poidan precisar para mellorar a súa competitividade”, subliñou.

A nova orde mobilizará preto de 4 millóns de euros cada ano e permitirá financiar melloras en tres ámbitos:

• Modernización dos locais, como reformas, equipamento ou mobiliario.

• Ferramentas dixitais, que inclúen pantallas, xestión de redes sociais, deseño de páxinas web e proxectos de comercio electrónico.

• Sostibilidade ambiental, con accións de eficiencia enerxética e packaging respectuoso co medio ambiente.

Unha das principais novidades é a posibilidade de financiar memorias técnicas elaboradas por especialistas, que analizarán cada comercio e orientarán sobre os apoios máis axeitados. “Queremos que os comerciantes teñan un diagnóstico claro e aproveiten ao máximo as axudas dispoñibles”, sinalou.

A convocatoria está prevista para finais de decembro ou comezos de xaneiro, polo que Alén animou ao sector a prepararse con tempo.

Como complemento, a Dirección Xeral organiza o 17 de outubro a xornada «Impulsando co comercio galego: innovación, dixitalización e experimentación» que terá lugar no GaiásTech, en Santiago, con prazas para 120 persoas e retransmisión por streaming.

O encontro ten como obxectivo poñer en valor as transformacións que están a experimentar os negocios locais en Galicia e contará con  mesas de casos de éxito, espazos de demostración tecnolóxica, talleres prácticos e zonas de networking para compartir experiencias.

Atraer á mocidade ao comercio local

Outro dos piares é achegar o comercio local á xente nova. A Xunta impulsa campañas como ‘Localízate’, con actividades en centros educativos e xincanas en prazas de abastos e rúas comerciais, que este curso se ampliará a sete cidades galegas.

Tamén promove a Feira de Emprendemento en Lugo e Vigo, dirixida a alumnado da ESO, para que os rapaces creen e vendan os seus propios produtos na rúa.

Alén puxo en valor o bono Activa Comercio, que mobilizou 35 millóns de euros en 2024, e outras campañas como ‘Merca no teu comercio’, dirixida tanto a concellos rurais como a barrios urbanos sen asociación de comerciantes, co obxectivo de dinamizar zonas con menor actividade. “Os bonos son unha excusa para que a xente nova entre no comercio local. Despois, depende dos negocios fidelizar ese cliente con melloras constantes”, apuntou.

Premios ao comercio galego

O director xeral lembrou que hoxe venres remata o prazo para presentar candidaturas aos Premios do Comercio Galego, que recoñecerán boas prácticas en cinco categorías: sustentabilidade ambiental, relevo xeracional, emprendemento, traxectoria e dinamización comercial. “Non é unha cuestión de cantidade, senón de calidade. Animamos a todos os comercios a participar antes de que peche o prazo”, subliñou.

Artesanía galega

A entrevista abordou tamén a promoción da artesanía, “a nena bonita” da Dirección Xeral, segundo Alén. Destacou iniciativas como ‘Artesanía no prato’, que recentemente levou a Lisboa a chefs galegos e portugueses xunto con artesáns, e a feira ‘Artesanamente’, celebrada en Santiago.

Tamén salientou o papel dos Pendellos da Golada, que cualificou como “o corazón da artesanía galega”. “A artesanía galega conserva a tradición, pero cunha visión contemporánea que está triunfando nos mercados internacionais”, concluíu.