Francisco Pérez, novo alcalde de Noia tras prosperar a moción de censura contra Santiago Freire

No texto da moción, os asinantes acusaron ao goberno de Freire de falta de transparencia na contratación, deficiencias na xestión de infraestruturas e servizos públicos e de actuar “de costas” á cidadanía. Pola súa banda, o alcalde saínte defendeu a boa saúde económica do Concello, atribuída á súa xestión, e acusou a Alamancos de “traizoar” a confianza depositada nel.

O pleno extraordinario desenvolveuse sen incidentes e cun salón cheo de veciños, que aplaudiron segundo as súas preferencias as intervencións dos portavoces. Xa coa vara de mando, Pérez Caamaño comprometeuse a recuperar servizos públicos deteriorados e a reactivar a economía dunha vila que cualificou de “potencia marisqueira a nivel galego”.

Esta é a primeira moción de censura aprobada en Galicia neste mes de agosto, nun contexto político marcado polo recente pronunciamento do Tribunal Constitucional, que eliminou o veto aos concelleiros tránsfugas para promover e apoiar este tipo de iniciativas.