Falece o condutor dun turismo tras saírse da vía en Ordes

É a terceira vítima mortal nas estradas das últimas horas.

Tras os sinistros rexistrados onte en Carballo e Curtis, un novo accidente esta mañá en Ordes deixa outro condutor falecido na N-550, ao paso pola parroquia de Leira.

Foron os axentes da Policía Local quen avisaron a través da súa chamada ao 112 Galicia. Segundo indicaron, o vehículo no que viaxaba a vítima saíuse da vía. Como consecuencia do impacto, a persoa quedou atrapada no interior, polo que foi necesaria a intervención dos bombeiros. Así, acudiron os efectivos do parque comarcal de Betanzos, que procederon a liberar o único ocupante do turismo. Aínda así, nada puido facerse por salvar a súa vida.

Ademais dos equipos de Urxencias Sanitarias de Galicia-061, bombeiros e axentes da Policía Local e Garda Civil de Tráfico, avisouse ao persoal de limpeza e mantemento da vía, así como á empresa subministradora da enerxía eléctrica por un cable que resultou afectado polo accidente.