Dúas colisións en Brión deixan unha persoa ferida leve e varios danos materiais

Un accidente de tráfico rexistrado este sábado na rotonda inferior da saída da autovía AG-56, en Pedrouzo (Brión), saldouse cunha persoa ferida de carácter leve. Segundo informaron dende o Grupo de Emerxencias de Brión, un dos condutores perdeu o control do seu vehículo e acabou impactando contra outro turismo que circulaba pola rotonda.

Como consecuencia do golpe, unha ocupante tivo que ser trasladada a un centro sanitario ao referir dor no peito, posiblemente provocado polo cinto de seguridade.

Pouco antes, produciuse outro sinistro viario no mesmo municipio, nesta ocasión na estrada N-543. O choque entre dous coches deixou só danos materiais e non requiriu intervención dos servizos de urxencia.