Dous condutores fuxen tras dous accidentes en Santiago

O venres ás 16:30 horas produciuse unha colisión entre dous vehículos na glorieta da SC-20 que conecta coa AP-9. Un dos condutores implicados abandonou o lugar sen dar conta do sucedido. Un día máis tarde, o sábado ás 18:24 horas, repetíase a situación na rúa do Restollal: dous coches víronse involucrados nun choque e novamente un dos implicados marchou sen agardar pola intervención policial.

Na mesma fin de semana houbo outros accidentes, como o rexistrado o sábado ás 20:46 horas na avenida de Castelao, con danos materiais, ou a saída de vía dun turismo na rúa das Rodas o domingo ás 19:29 horas, sen consecuencias persoais.

O domingo os axentes tamén tiveron que acudir á rúa Bautizados para auxiliar un veciño que quedara encerrado nun ascensor. Esa xornada destacou polo rexistro de dous incendios: un na rúa Ponferrada, provocado por unha tixola esquecida no lume, que obrigou ao traslado dunha muller ao CHUS; e outro na rúa Santiago de Chile, a consecuencia dun frigorífico, que fixo necesaria a intervención dos bombeiros e o traslado de dúas persoas ao Policlínico A Rosaleda por inhalación de fume.

A maiores, o parte recolle servizos en manifestacións, controis de tráfico e intervencións en festas en pisos, sen incidencias de relevo.