Country en galego e con retranca: a banda Uns actúa este sábado no CGAC en Santiago

• A banda galega Uns combina o son country americano coa lingua galega nun proxecto con raíces locais, retranca e conciencia social.
• Este sábado actúan no CGAC, en Santiago de Compostela, a partir das 20:00 horas con entrada inversa

Os galegos Uns, grupo nado en 2022 entre Compostela e A Coruña, avanza con forza no panorama musical apostando por un country “feito con retranca e identidade galega”. Nunha entrevista en Radio Líder Santiago, o seu vocalista e compositor Xavi Ferreirós falou da traxectoria do grupo, do seu novo EP profesional en camiño e da súa visión cultural comprometida: “O noso selo como galegos nótase na música, na lingua e na retranca”.

Uns xorde do encontro de catro músicos que xa se coñecían e decidiron dar forma a cancións con son atlántico, inspiradas en artistas coma Johnny Cash ou Dolly Parton, pero escritas en galego. “Non esperes por min, meniña”, un dos temas máis significativos, relata a historia dun home no cárcere que lle pide á súa amada que non agarde por el. “É un tema moi do country: vidas duras, xenerosidade, humanidade… máis alá dos prexuízos”, afirma Ferreiro.

A banda actuará este sábado ás 20:00 horas no Espacio X do CGAC en Santiago, con “entrada inversa”, é dicir, ao gusto do público: “Traede moedas de prata, de ouro ou billetes. Que cada quen pague polo que sente que recibe”, convida con humor.