Constitúese a comisión de seguimento das obras de humanización do Milladoiro
Líder Redacción
1 de febrero de 2025 a las 14:16
- Esta comisión é resultado dunha demanda realizada ao Goberno a pasada semana
- Recolléronse diversas suxestións para mellorar a sinalización da obra e a información á cidadanía
- O alcalde urxe a execución do proxecto aprobado no ano 2022 para conectar a SC-20 co parque empresarial do Milladoiro
O alcalde, Blas García, e a Subdelegada do Goberno, María Rivas, veñen de presidir a primeira sesión da comisión de seguimento das obras de humanización do Milladoiro, á que tamén asistiron os concelleiros de Obras e Urbanismo, Gustavo Nieto e Víctor Fernández. Este órgano é resultado da demanda realizada por parte da Alcaldía á Delegación do Goberno o pasado luns 20 de xaneiro.
Esta comisión nace co propósito de que as distintas asociacións empresariais e plataformas veciñais poidan trasladar as súas suxestións e demandas ás administracións e empresas competentes no desenrolo da obra. Nela estiveron representados Xuntanza de Empresarios de Ames; Asociación de Empresarios Novo Milladoiro; Asociación Viorneira, Palmira, Bulevar; Plataforma N-550; Concello de Ames; Demarcación de Estradas do Estado; e as empresas que están a realizar a actuación, Prace e Eptisa.
O resultado desta primeira xuntanza foi o acordo de establecer un plan de comunicación para trasladar debidamente á veciñanza as actuacións máis traumáticas e fitos importantes da obra. Do mesmo xeito tamén se acordou seguir reforzando a sinalización e o desvíos pois, aínda que se detectou que diminuíu o tráfico polo centro do núcleo, esta tendencia debe continuar: “O Milladoiro é unha vía urbana, xa non será máis unha vía de paso. Esta actuación é para o desfrute da veciñanza”.
Por outra banda, dende o Concello demandouse máis persoal para que esta humanización non se dilate máis tempo do debido. O alcalde tamén recordou a necesidade de acometer a actuación do novo acceso ao parque empresarial do Novo Milladoiro dende a SC-20 para aliviar o tráfico da avenida pois, recordou, “este proxecto foi aprobado no ano 2022”.
