Compostela prende este venres o Nadal: Esta é toda a programación

Acendido do Nadal no Obradoiro

A festa de acendido celebrarase ás 19:00 horas na praza do Obradoiro cun espectáculo protagonizado por artistas locais. A compañía de circo Pistacatro, recentemente galardoada co Premio Nacional de Circo 2025, ofrecerá un extracto do seu show Sen patrón.

Antes, ás 18:30 h, partirán dúas comitivas desde a Carreira do Conde e a Porta do Camiño, acompañadas por grupos tradicionais, facendo paradas no Toural e en Cervantes para prender as instalacións luminosas destas prazas.

No preludio do acendido tamén participarán artistas de Circo Mestura coa disciplina de lollipop, e a compañía Duelirium, que preparou unha intervención especial nas alturas, con bailarinas e acompañamento musical de Mónica de Nut.

Iluminación: máis de 290 arcos e 125 árbores iluminadas

A cidade contará este Nadal con:

• 2.935 metros de corredores luminosos

• 290 arcos

• 296 motivos en farolas

• 8 elementos singulares

Unha árbore transitable de 20 metros no Obradoiro

Dous paraugas de grilandas no Toural e Cervantes

Iluminación especial en Praterías, praza Roxa, praza de Galicia, o antigo Concello en Cervantes e o Pazo de Raxoi

125 árbores iluminadas e decoración en parroquias

A iluminación activarase este venres, dando inicio ao Nadal compostelán, que incrementará actividade ao longo de decembro.

Xardín dos xogos do Obradoiro

Tamén o venres abrirá o xardín dos xogos, que medra en altura e incorpora novos elementos deseñados para estimular a creatividade e o xogo libre. Complementarase coa instalación do xardín das oito puntas, que este ano integrará árbores naturais xa existentes en varios barrios.

Apoio ao comercio local

A campaña inclúe iniciativas para dinamizar o comercio de proximidade, como a ruleta de agasallos “Eu Merco Aquí”, presente na Praza Roxa e na Alameda, onde se repartirán premios a cambio dun tícket de compra no comercio local.

Carpa Roxa e Carpa da Alameda

As dúas grandes carpas ofrecerán decenas de actividades:

Carpa Roxa (desde o 5 de decembro)

• Máis de 30 actividades e obradoiros

• Ciclo musical Son Xove os venres e sábados

• Novidade: programación “Eh! Domingo!”, con propostas como a discoteca de señoras e señores, actuacións musicais e Bingos Musicais

Carpa da Alameda (desde o 19 de decembro)

• Actividades específicas para nenos e nenas

• Pista de xeo ecolóxica

Mercados de Nadal

• Mercado de Nadal da Carreira do Conde: do 28 de novembro ao 5 de xaneiro.

• Mercado de Nadal de Área Central: do 20 de decembro ao 5 de xaneiro.
  Reunirán case 90 expositores de alimentación, artesanía, ilustración, téxtil, cosmética e produtos solidarios, ademais dun espazo infantil con preto de 40 obradoiros.

Programación nos centros socioculturais

Os centros municipais ofrecerán 75 actividades, con obradoiros infantís, familiares e para adultos: cociña de Nadal, elaboración de centros de mesa, velas, monicreques e talleres de circo na Casa das Máquinas con CircoNove.

Carreira de San Silvestre

A tradicional carreira celebrarase o 31 de decembro ás 17:00 h con saída no Obradoiro. O obxectivo é superar as máis de 2.200 inscricións do ano pasado.

Festa de Fin de Ano

O 31 á noite repetirase o formato de éxito: música na rúa coa Mecánica Rolling Band e as badaladas no Obradoiro para recibir o 2026.

Outros eventos destacados

• Quedada “Estrelas e Desexos”: 30 de decembro na Alameda, coa Orquestra de Malabares de Pistacatro.

• Festa do Apego: sábado 27 no Auditorio.

• Ruada do Apalpador e Cabalgata de Reis.

Animación de rúa durante todo o mes.