Asociacións veciñais de Santiago reclaman melloras no transporte e na taxa do lixo

• Manifestou a necesidade de mellorar o transporte urbano, con máis frecuencias, marquesiñas e paneis informativos en todo o termo municipal, actualizando o parque de vehículos
• Asinouse un documento de apoio á loita dos veciños de San Lourenzo para evitar a reapertura da sala Malatesta
• A reunión, na que participaron 15 asociacións e FERUSA para formalizar a Coordinadora, celebrouse onte na Casa das Asociacións de Cornes

Santiago de Compostela, 18 de setembro de 2025 (Vía Láctea Comunicación).- A Coordinadora das Asociacións Veciñais de Santiago celebrou onte mércores unha reunión na Casa das Asociacións de Cornes na que estiveron representadas 15 asociacións xunto a un representante da Federación de Asociacións Veciñais do Rural de Santiago (FERUSA). No encontro tratáronse os seguintes asuntos:

• Formalización da Coordinadora:

Acordouse formalizar a Coordinadora, que de xeito provisional estará formada polos representantes veciñais no Consello de Relacións Veciñais, para avanzar na agrupación das asociacións da cidade, así como a celebración de reunións trimestrais, con carácter ordinario, ademais das que poidan establecerse puntualmente para tratar asuntos de interese xeral a demanda das Asociacións.

Inicialmente, asígnase a Coordinadora a elaboración de propostas de alegacións tipo para que logo cada Asociación poida adaptalas aos seus intereses e presentalas no Concello para a mellora das propostas de ordenanzas e outras decisións que poida adoptar o equipo de goberno municipal.

Tamén se acordou elaborar unha proposta de posta ao día do Regulamento de Participación Cidadá, dado que o actual data do ano 1998, así como solicitar a convocatoria da correspondente reunión do Consello de Relacións Veciñais.

• Análise da Proposta de Nova Taxa do Lixo:

É opinión unánime das Asociacións que se aplique o principio de “pago por xeración” e rexeitar o criterio de vinculación desta taxa co valor catastral das vivendas no caso da tarifa doméstica, porque nada ten que ver o valor catastral co lixo xerado, e os incrementos para as vivendas que teñen un consumo de auga inferior a 10 m3/mes vai dende o 0% ata o 52% en función do valor catastral que teña a vivenda.

Do mesmo xeito, púxose de manifesto a necesidade de coñecer o estudo económico do que vai supoñer esta taxa en termos de recadación e do custo actual do servizo.

Tamén se manifestou a necesidade de que no caso da hostalaría se computen coma superficie dos locais as terrazas, dado que nelas xérase unha parte moi importante dos residuos de esta actividade, así como a de asimilar a categoría de bares e restaurantes, dado que hoxe en día a gran maioría dos bares están actuando como restaurantes.

Analizouse tamén o caso de Oviedo, onde a taxa das vivendas varía en función da frecuencia da recollida do lixo, pasando de 79,08 €/ano a 38,34 €/ano no caso da recollida dous días á semana.

Finalmente acordouse preparar unha alegación tipo que se remitirá a cada unha das asociacións para que poidan formular a súa propia alegación.

• Servizo do Transporte Urbano

Por parte das Asociacións púxose de manifesto a necesidade dunha mellora substancial do transporte urbano de Santiago, mellorando frecuencias, dotar as paradas de marquesiñas e paneis de información en todo o termino municipal, axilidade na comunicación de cambios de horarios, actualización do parque de vehículos, a utilización de vehículos de tamaños adaptados ás vías  e rúas polas que discorren as liñas, e acordouse continuar recollendo información sobre este servizo.

• Apoio aos veciños de San Lourenzo

As asociacións presentes asinaron un documento en apoio á loita dos veciños de San Lourenzo para evitar que se reabra a sala Malatesta coma local de ocio nocturno, porque a actividade pretendida ten sido cualificada de forma reiterada pola xurisprudencia como “molesta” e “insalubre” e atenta contra dereitos fundamentais dos veciños como son a inviolabilidade do seu domicilio ou o dereito ao descanso nocturno.