As asociacións veciñais reclaman á alcaldesa frear a reapertura da Sala Malatesta
A Coordinadora das Asociacións Veciñais de Santiago de Compostela fixo público un comunicado no que manifesta o seu apoio incondicional aos veciños de San Lourenzo e á Asociación Río Sarela, tras coñecerse a nova da reapertura da Sala Malatesta, situada na rúa de San Lourenzo.
Líder Redacción
7 de noviembre de 2025 a las 14:31
Interior da sala Malatesta | Arquivo
No texto, a Coordinadora lembra que a actividade que pretende desenvolver o local “en horario nocturno” foi cualificada en numerosas ocasións pola xurisprudencia como molesta e prexudicial para a saúde, o que a fai “incompatible co uso residencial” da zona.
Ademais, salientan que os expedientes administrativos previos, que levaron ao peche do local durante máis de seis meses, deberían ter motivado unha avaliación exhaustiva sobre “os efectos cuantitativos e cualitativos” que a actividade do espazo de ocio provocou no pasado e pode volver provocar na veciñanza.
Dende o punto de vista veciñal, a Coordinadora considera que a reapertura contradí o primeiro obxectivo do Plan Especial PE-1, que é “manter e reforzar o uso característico residencial do ámbito”. Por iso, fan un chamamento á alcaldesa para que “poña todos os medios necesarios” co fin de garantir os dereitos constitucionais dos veciños á intimidade no domicilio e á saúde.
