Arzúa Viva ofrece un bus para asistir á protesta contra Altri en Santiago

Con esta medida, desde o colectivo Arzúa Viva, membro da Plataforma Ulloa Viva, queren animar ao conxunto da veciñanza de Arzúa a participación da manifestación pola defensa do territorio que percorrerá as rúas de Santiago de Compostela baixo o lema “A Xunta non pode calar a todo un país, ALTRI NON”.

Segundo o colectivo en Arzúa, “a implantación da macrocelulosa en Palas de Rei suporía un gran prexuizo non tan só para a comarca da Ulloa, senón tamén para o conxunto do país, e nomeadamente para Arzúa e a súa comarca, xa que esta afectaría a dous dos principais sectores económicos da nosa vila como son o sector agrícola e de transformación, así como o sector turístico vinculado ao camiño de Santiago, ao tempo que afectaría tamén en outros aspectos como á contaminación do Río Ulla e polo tanto, ao Encoro de Portodemouros ou á saúde das persoas, xa que en condición de vento favorables os fumes contaminantes da factoría chegarían ata o noso concello”

É por iso que animan a toda a veciñanza a participar na mobilización convocada para este 15 de decembro en Santiago de Compostela xa que «a participación cidadá é clave para amosar o rexeitamento do conxunto da cidadanía galega á implantación desta macrocelulosa no corazón de Galiza”

Desde Arzúa Viva sinalan que para poder facer uso deste servizo de autobús, que sairá ás 10:45 h. do aparcadoiro público sito na Rúa de Lugo, é preciso anotarse no teléfono do Concello de Arzúa no 981 50 00 00, ou no formulario web que se pode atopar nas redes do propio colectivo.