Ames suspende a tradicional Cabalgata e mantén a Gran Festa de Reis

• O Concello de Ames modifica a súa programación de Reis polas condicións meteorolóxicas adversas previstas para este domingo, suspendendo así a tradicional Cabalgata de Reis
• A concelleira de Promoción Económica, Ana Belén Paz, explicou os motivos desta modificación, “despois dunha reunión, tomamos a decisión de suspender as cabalgatas do día 5 de xaneiro pola tarde. Creo que temos que primar a seguridade, sobre todo dos nenos e nenas. Eso si, mantemos a Festa de Reis nos pavillóns do Milladoiro e Bertamiráns, aumentando as horas para así gozar de todos xeitos dunha gran festa”.

Ames, 3 de xaneiro de 2025.- O Concello de Ames modifica a súa programación da Gran Festa de Reis debido ás predicións meteorolóxicas adversas previstas para este domingo. Deste xeito, suspéndese a cabalgata de Reis, trasladando toda a actividade do día aos pavillóns municipais do Milladoiro e Bertamiráns. Polo tanto, os nenos e nenas de Ames poderán gozar da visita dos Reis Magos a cuberto, cunha gran festa que incluirá charanga e DJ. No Milladoiro a festa será desde as 17.00 horas ata as 19.00, mentres que en Bertamiráns será desde as 19.00 horas ata as 21.00. A apertura de portas en ámbalas dúas localidades será media hora antes do inicio da actividade. Cómpre destacar que os nenos e nenas que tiñan previsto ir nas carrozas coas Súas Maxestades poderán estar con eles durante a festa no pavillón e, ademais, terán prioridade para subir cos Reis na cabalgata do vindeiro ano.

O Concello de Ames modifica a programación da súa Gran Festa de Reis polas predicións meteorolóxicas previstas para este domingo día 5 de xaneiro. Deste xeito, suspéndese a tradicional Cabalgata de Reis, trasladando toda a actividade do día aos pavillóns municipais. Os nenos e nenas de Ames non quedarán sen a visita dos Reis Magos, pois a festa de Reis mantense, aumentando as horas de actividade prevista.

Pola súa banda, a concelleira de Promoción Económica, Ana Belén Paz, explicou os motivos desta modificación, “despois dunha reunión, tomamos a decisión de suspender as cabalgatas do día 5 de xaneiro pola tarde. Creo que temos que primar a seguridade, sobre todo dos nenos e nenas. Eso si, mantemos a Festa de Reis nos pavillóns do Milladoiro e Bertamiráns, aumentando as horas para así gozar de todos xeitos dunha gran festa”.

Ampliación de horarios nos pavillóns

Deste xeito, a apertura de portas no pavillón municipal do Milladoiro será ás 16:30 para dar comezo á festa de 17.00 a 19.00 horas. No caso de Bertamiráns, a apertura de portas producirase ás 18.30 e a festa será de 19.00 a 21.00 horas. En ámbalas localidades os asistentes poderán gozar coas actuacións da Charanga Bicoia, Charanga TNT e os Tiralle do Aire así como da animación a continuación ao cargo dos DJs reais.

Cómpre destacar que todos os nenos e nenas que estiveran na listaxe para subir cos Reis Magos ás carrozas poderán gozar dese momento dun xeito diferente, pois entrarán nos pavillóns á festa xunto co seu Rei Mago asignado. Así mesmo, os nenos e nenas que tiñan previsto ir este ano nas carrozas quedarán na listaxe para participar na cabalgata do ano que vén.

Quedan ocos libres para as Recepcións Reais do sábado 4

O resto da programación de Reis de Ames mantense, tanto as visitas dos Reis polas parroquias, como o servizo de tren e as Recepcións Reais previstas para hoxe venres 3 como para mañá sábado 4. Con todo, quedan ocos libres para as recepcións reais na tarde do sábado, entre as 18.00 e as 19.30 horas. Para as persoas interesadas en acudir, só é necesario que se presenten a esa hora nos pavillóns, sen necesidade de cita previa.