Aberta a inscrición para os Premios RAGC-UIE a investigadores de ata 40 anos en Galicia

Este certame, que ten unha periodicidade bienal, distingue tres ramas de coñecemento, cunha dotación de 5000 euros cada un dos tres premios. Por un lado, recoñécese a contribución da investigación ao desenvolvemento das Ciencias Básicas en Galicia, en calquera dos campos da física, a química, as matemáticas, a bioloxía, as ciencias biomédicas e a xeoloxía. Ademais, prémiase o impacto da investigación no desenvolvemento das Ciencias Sociais na nosa comunidade nos eidos da economía, a socioloxía, a antropoloxía social e a psicoloxía social. Por último, na rama das Ciencias Técnicas recoñécese a contribución da investigación ao desenvolvemento tecnolóxico nas áreas da enxeñaría e a arquitectura, valorando o grao de innovación e a súa aplicabilidade. En cada unha das categorías poderá concederse un accésit.

Poderán presentar a súa candidatura todas aquelas investigadoras e investigadores que desenvolvan a súa actividade en Galicia e que non superen os 40 anos de idade, ou os 42 no caso das mulleres que foran nais ou das persoas con algunha incapacidade.

O 7 de maio remata o prazo para presentar as candidaturas a estes premios

As candidaturas deberán presentarse a través dun formulario específico na web da RAGC (www.ragc.gal), describindo a traxectoria investigadora. Valorarase a contribución á creación de coñecemento por medio de publicacións en libros e revistas, a traxectoria internacional, a dirección ou participación en proxectos e captación de fondos para investigación, a dirección de teses de doutoramento e de proxectos fin de máster, así como a difusión da ciencia á sociedade. O prazo da convocatoria remata o vindeiro 7 de maio. As premiadas e premiados recibirán os seus galardóns nun acto que se celebrará en xuño.

Miguel Ángel Escotet: “UIE comprométese coa investigación básica e aplicada, especialmente cos mozos investigadores”

En palabras do reitor da Universidad Intercontinental de la Empresa, Miguel Ángel Escotet, “con iniciativas como o seu instituto universitario de investigación ou estes premios, xa na súa segunda convocatoria bienal, UIE comprométese coa investigación básica e aplicada, e, especialmente, cos mozos investigadores. Formación, investigación e servizo social e cultural á comunidade son obxectivos que están insertos no noso ADN e, para promovelo, dedicamos o 5% do noso orzamento anual a investigación e transferencia”. Neste sentido, engade o reitor, “a RACG e a UIE impulsan con este certame a dinamización do saber, ao estar enfocado a dar recoñecemento público e potenciar as traxectorias de investigadoras e investigadores novos que desenvolven a súa carreira en centros de investigación en Galicia, e que contribúen co seu labor ao impulso do coñecemento científico como motor indispensable de progreso social”.