A San Silvestre Padronesa despedirá o ano cunha carreira solidaria de 5,7 quilómetros
O Concello de Padrón convoca novamente á cidadanía a participar na San Silvestre Padronesa 2025, unha cita deportiva xa consolidada no municipio e que combina exercicio, convivencia e solidariedade. A proba, non competitiva e aberta a todas as idades, celebrarase o mércores 31 de decembro ás 17:00 horas.
Líder Redacción
9 de diciembre de 2025 a las 19:53
O percorrido, duns 5,7 quilómetros, partirá do Paseo do Espolón, lugar onde tamén se realizarán as inscricións entre as 15:45 horas e 10 minutos antes do inicio. A organización lembra que a carreira pode facerse camiñando, correndo ou en bicicleta, promovendo así a participación familiar. As persoas menores deberán ir acompañadas por un adulto responsable.
Como cada ano, a San Silvestre mantén o seu marcado carácter solidario. Para inscribirse, cada participante deberá achegar un quilo de alimento non perecedoiro, que será destinado a entidades sociais do municipio. Ao remate da proba, todas as persoas participantes serán agasalladas cun tradicional chocolate con churros, un momento de convivencia que contribúe a pechar o ano nun ambiente festivo e comunitario.
A carreira está organizada polo Concello de Padrón, en colaboración con Cáritas Padrón, o Club Ciclista Padronés Cortizo, Protección Civil e a Deputación da Coruña. Desde o consistorio destacan que esta actividade forma parte da programación de Nadal e reflicte o compromiso municipal coa vida saudable, o deporte e a participación veciñal.
Para máis información, a veciñanza pode contactar coa Oficina de Deportes do Centro Social no teléfono 981 811 329.